La Coordinadora Ecoloxista denuncia un vertíu na ría de Villaviciosa

|

La Coordinadora Ecoloxista d'Asturies ta acabante denunciar énte la Confederación Hidrográfica del Norte, la Demarcación de Costes y el Serviciu de Protección de la Naturaleza de la Guardia Civil (Seprona) un vertíu asocedíu'l pasáu vienres na ría de Villaviciosa na zona del paséu de la Barquerina, que causó la muerte de cientos de pexes.

Según la CEA "esti nuevu episodiu de mortandá de pexes, producíu por un vertíu non autorizáu, que tien al apecer orixe nos vertíos d'una empresa llactea de la zona, ye ún más de los que venimos denunciando d'agües residuales industriales y urbanes ensin depurar a la ría de Villaviciosa, dientro de la Reserva Natural Parcial. Vertíos que se vienen produciendo pola neglixencia del Principáu y del Ayuntamientu que nun fai lo suficiente por evitalos".

Pa los ecoloxistes "sorprende qu'un espaciu que nagua por ser reconocíu internacionalmente y tar dientro la Llista d'Humedales d'Importancia Internacional polos sos destacaos valores ambientales y tramitalo énte'l Secretariáu del Conveniu Internacional RAMSAR (Convención Internacional relativa a los Humedales d'Importancia Internacional) alcuéntrese nesta situación de precariedá por una mala xestión de les agües residuales".

Contador Estadistiques