Suatea recuerda la obligatoriedá d'ufiertar Llingua Asturiana en tolos cursos

El sindicatu d'enseñanza SUATEA recordó, tanto a la Inspeición Educativa como a tolos centros d'enseñanza pública d'Asturies, que "l'asignatura de Llingua Asturiana y Gallego-Asturianu ye d'obligada ufierta y que lo mesmo que los inspectores de los centros tienen que procurar velar pol cumplimientu de toles lleis educatives, deberíen facer lo mesmo col accesu al estudiu y conocimientu de la nuesa llingua, que ye un derechu reconocíu espresamente pola llexislación y qu'ha respetase y garantizase".

   Ál traviés d'un comunicáu, fizo tamién un llamáu "pa evitar malos entendíos", a los responsables de los centros. "Esperamos que nengún equipu direutivu, nin nengún maestru escaeza que los escolinos puen escoyer Llingua Asturiana y Gallego-Asturiano al entamar cualesquier cursu educativu, independientemente de la escoyeta del cursu anterior".

   "Teniendo en cuenta qu'esta ufierta ye obligatoría en tol sistema educativu (Educación Infantil, Primaria, Secundaria, Bachilleratu) dende Suatea, taremos vixilantes de que se cumpla la llexislación vixente", recordó'l sindicatu. Mostró asina'l so deséu de que "al entamu del cursu viniente nun mos alcontremos colos mesmos problemes de tolos años, por mor de nun ufiertar esta asignatura y nun respetar la Llei d'Usu".