El Muséu del Pueblu d'Asturies entama dos cursos de branu

El "Muséu del Pueblu d'Asturies" de Xixón entama pal mes de xunetu dos cursos de branu que tienen la música tradicional asturiana como protagonista. Per un llau va celebrase un "Taller de percusión d’acompañamientu en bandines tradicionales", y per otru un cursu pa neños dedicáu a la gaita y los instrumentos de percusión que l’acompañen, nel que se combinarán clases teóriques y lleiciones práctiques con conciertos y actividaes complementaries.

El primer de los cursos, "Taller de percusión d’acompañamientu en bandines tradicionales" va impartilu David Varela Blanco y va allugase nel Salón d'actos del Pabellón Expo92 del Muséu del Pueblu d’Asturies durante los díes 3, 4 y 5 de xunetu de 10 a 14 h. El númberu de places ye 20 y el preciu de 12 €. El plazu de matrícula ye del 10 al 22 de xunu y puede facese per internet, Oficines d’Atención al Ciudadanu y caxeros ciudadanos (códigu del cursu: 198). Pa informase de cualesquier detalle puede llamase a esti teléfonu 98518104.

El segundu de los cursos ye pa escolinos y ta dedicáu a la gaita y los instrumentos de percusión que l’acompañen, nel que se combinarán clases teóriques y lleiciones práctiques con conciertos y actividaes complementaries. Organízalu la "Escuela de Música Tradicional Villa de Xixón" y Conceyalía de Cultura Tradicional. Va allugase tamién nel Muséu del Pueblu d’Asturies y va ser tolos martes y xueves del mes de xunetu de 12 a 14 y de 17 a 19 h y ta dedicáu a escolinos a partir de 6 años. La inscripción ye de baldre reservando plaza nel Muséu del Pueblu d’Asturies (telf.: 985182960, de martes a vienres). Nel momentu d’inscribirse, los escolinos deben escoyer una d’estes tres opciones: 1) gaita, 2) tambor, 3) pandereta. La fecha d’inscripción ye hasta’l 26 de xunu. Los materiales y instrumentos apúrrelos la Escuela de Música Tradicional Villa de Xixón.