Lastra (PSOE) diz que Valledor tien "una inversión de valores" al creer que'l drama que vive Asturies ye'l de la llingua

El voceru parlamentariu del Partíu Socialista na Xunta Xeneral del Principáu, Fernando Lastra, señaló güei que'l diputáu d'IU-BA-Verdes, Francisco Javier García Valledor, tien una "inversión de valores mui grande". "Nun pue ser que crea que'l drama que vive agora Asturies ye'l de la llingua asturiana", dixo.
   Lastra destacó en declaraciones a Europa Press que la postura de Valledor ye "un error" y supón "nun tar na realidá de la sociedá tanto asturiana como española, que ta preocupada pol desemplegu y la situación de les empreses".
   Poro, pidió al diputáu d'IU que "nun se confunda", al plantegar una alarma basada en que "agora ye la llingua asturiana la que pue definir el drama de la sociedá asturiana". "Ye una ilusión llamentablemente poco realista y alloñada de les preocupaciones de los ciudadanos", aseguró diciendo que "cada cosa nel so sitiu".
   Ye ye que pa Lastra "nun hai qu'invertir la xerarquía de los problemes qu'hai na rexón", a la vez que consideró que lo que-y pasa a Valledor ye que llega a la "confusión" de ver "xigantes onde sólo hai molinos".
   Asina lo dixo en rellación a la intervención de Valledor nel plenu de güei nel que llamó "caradures" y "engañabobos" a los diputaos del PP por refugar los so votos pa sacar alantre sin enmiendes la proposición non de llei relativa al asturianu, que pidía que se reconociere xurídicamente la especialdiá pal profesoráu qu'imparte la enseñanza. Valledor los acusó de votar a la escontra de lo qu'ellos mesmoos proponíen.
   "El PP nun-y fizo munchu casu porque los llamó caradures", recordó Lastra apuntando que "nun ye una bona manera de tentar de llegar a un acuerdu", y consideró que "nun tuvo mui finu al tentar de tener un acuerdu col PP, deslleal cola so fuerza política, insultándolos". "Qué pasó, que nun lo llogró, pero eso ye problema d'él", resaltó.
   Amás, ante la intervención del diputáu d'IU, Lastra dixo qu'a los socialistes yá nin-yos molesta "esti tonu qu'usa", anque afirmó que "nun dexa de sorprender que seya una práutica constante la desllealtá colo que fai la so propia fuerza política". Asina, dixo que "hasta pa tar en desacuerdu se pue ser educáu y menos agresivu", remarcó.
   Sicasí, Lastra remarcó que lo acordao ente'l PSOE y IU-BA-Verdes ta cumpliéndose "con rigor" y dixo que Valledor suel cumplir los compromisos a los que llegare cola so formación. "Esto ye una circunstancia peculiar, una actuación pintoresca, y hai que tomala asina", señaló.
   Poro, Fernando Lastra dixo que nun va xulgar la so actuación de güei. "Valórase sólo", afirmó remarcando que "nun s'escuende" pa dicir lo que piensa. "Lo qu'importa ye'l resultáu, que ye que sacamos la proposición alantre con acuerdu unánime", acabó.