El Gobiernu asturianu, "indignáu" ante les acusaciones del PP sobre'l parentescu de los hermanos Marroquín

El conseyeru d'Economía y Facienda, Jaime Rabanal, dixo güei que tenía un fonderu sentimientu de "indignación" tres sentir les acusaciones del PP, que calificó de "illegal" la rellación de parentescu de la Interventora Xeneral, Margarita González Marroquín, y del director xeneral del Institutu de Desarrollu Económicu del Principáu d'Asturies (Idepa) que son hermanos. A xuiciu de Rabanal, les acusaciones del PP son "impresentables" y "irresponsables".
   Nel plenu de la Xunta Xeneral del Principáu d'Asturies (XXPA), la diputada del PP Alejandra Cuétara dixo que la situación de los hermanos Marroquín ye "illegal" y que ruempe'l principiu d'independencia que tien de rexir nos llabores desarrollaos pola Intervención. Señaló que se trata de dos altos cargos, y que'l so parentescu incumple la llei del Principáu d'incompatibilidaes.
   Sin embargu, Rabanal exixó al PP "respetu" hacia les instituciones del Principáu, tres calificar la intervención de Cuétara de "grotesca". Refugó qu'existan illegalidaes sobre esti asuntu, y insistió en que la Interventora Xeneral nun fiscaliza al Idepa, sinón que lo fai un interventor con plena "independencia". Como argumentación principal Rabanal señaló que'l PP lleva tiempu utilizando informes de la Intervención pa criticar al Gobiernu.
   Sicasí, les pallabres de Rabanal nun convencieron a Cuétara, que dixo que la Interventora Xeneral fiscaliza tol sector públicu asturianu, incluyíu l'Idepa. Aludió asina a una declaración de Margarita González Marroquín respondiendo sobre la fiscalización del institutu. Na so respuesta, Rabanal dixo qu'él mesmu tamién fala sobre les cuentes del Idepa, lo que nun implica que fiscalice l'órganu. Amás, el conseyeru esplicó qu'hai otres rellaciones de parentescu na Intervención Xeneral, lo que nun implica qu'eso afeute a la so independencia.
   De fechu, Rabanal mostró la so estrañeza de que'l PP saque a agora esa supuesta incompatibilidá, cuando la situación producida lleva dellos años. "Sinceramente, too eso ye mui poco serio", comentó. "Vamos ver si llevamos esto a los tribunales", añadió, en rellación al espardimientu de la situación, per parte del PP, n'otres comunidaes autónomes per mediu de cartes.