Los trés grupos parlamentarios PSOE, PP y IU-BA-Verdes ofrecieron tol so apoyu al conseyeru d'Industria y Emplegu del Principáu, Graciano Torre, pa evitar el zarru de la planta de la empresa de refractorios Vesuvius Ibérica, asitiada en Riañu (Llangréu).
 
El diputáu del PP, Ramón García Cañal, pidió amás al conseyeru que reflexone pa que nun se quite a l'Alministración Pública la garantía a la hora d'ofrecer avales y sovenciones a empreses pa que nun puean marchar sin cumplir los sos compromisos tres cobrar les ayudes.

   Asina lo manifestó Cañal demientres una intervención na qu'entrugó al conseyeru sobre les midíes que va adoptar el Principáu sobre la decisión de la empresa de refactarios Vesuvius Ibérica de pesllar la panta asitiada en Riañu. Cañál mostró al conseyeru l'apoyu del grupu parlamentariu del PP pa negociar cola empresa y evitar el zarru de la planta. "Que sepa'l conseyeru qu'a la hora de negociar lo fai tmaién en ome de los grupos parlamentarios", dixo Cañal.

   Graciano Torre indicó que Vesuvius s'instaló en 1987 y algamó sovenciones importantes cola condición de recolocar a escedentes de las siderurxa, igual que dempués volvió a cobrar sovenciones en 1997 y hasta entós se cumplieron los compromisos.

   Dixo que yá treslladó a la empresa que'l Principáu entiende que nun hai razones pa que piesllen la planta y agradeció al grupu del PP l'apoyu nesti asuntu pa poder "lluchar codu con codu pa caltener la planta".

   El conseyeru calcó na Cámara que yá treslladó a la empresa les razones que'l Principáu alega pa refugar la decisión de la compañía y que tamién alvirtió a los empresarios que'l zarru va resulta-yos "difícil y costosu".

   Cañal recordó que Vesuvius ye una d'eses empreses qu'a últimos de los 80 decidió instalase n'Asturies acoyéndose a abondoses ayudes públiques, y añadió que la marcha de la empresa "foi l'apropiada porque en 1992 s'entamaron nueves inversiones de nuevo implicando ayudes públiques".

   El diputáu del PP dixo amás que les coses nun debíen dir nada mal a la compañía cuando a últimos del 2008 volvió solicitar ayudes p'ampliar la planta de Llangréu, anque decidió nun realizar la inversión hasta'l momentu, y "too indica que nun les va facer".

   "El PP tamién mos aconceyamos colos trabayadores de la instalación que mos tresmitieron les sos inquietudes y mieos, asina como la situación na que s'alcuentren 80 families y mos entrugamos si ye normal que nun se tenga otra solución que nun seya'l zarru", dixo.

   Dende'l PP consideren que nun hai razones de pesu que xustifiquen el zarru por delles razones. Hasta'l 2008 algamó beneficios, amás la factoría de Riañu tien una razonable carga de trabayu y pidíos, nun ta parada y dexa satisfechos a los clientes. Amás, la planta asturiana cuenta con una plantiya mui cualifiada y implicada col factoría.

   Poro Cañal, insistió en que nun hai razones pa desllocalizar la producción y añadió que'l PP considera qu'hai que defender el futuru de la factoría, polo que la so intención al presentar esta entruga pasa per pidir que se xestionen al más altu nivel les cuestiones a realizar. Sicasí, indicó que yá conocieron les "males" noticies sobre'l conceyu calteníu ente'l conseyeru y los máximos directivos de la empresa.

   "Queremos que tengan claro que gastamos munchos fondos públicos pal caltenimientu de la empresa", dixo Cañal, qu'insistió en que nun hai razones de tipu industrial pa que la planta pieslle.

   Pela so parte, el diputáu d'IU-BA-Verdes, Jesús Iglesias, tamién mostró l'acuerdu del so grupu pa tratar d'evitar el zarru de la factoría, y poro indicó qu'asina lo van facer constar na moción siguiente a la entruga de güei.

   "Debe haber un compromisu firme per parte de toles alministraciones", dixo Iglesias que recordó que la empresa s'asitia nuna zona "sensible" como son les cuenques mineres y qu'insistió en que nun tien nenguna llóxica que Vesuvius abandone Asturies.

   Tamién el diputáu del PSOE, Luis Ángel Colunga, destacó la importancia de que'l parlamentu muestra unidá nesti asuntu.