El colectivu Ecoloxista d'Avilés solicitó a la Demarcación de Carreteres y a la Direición Xeneral de Biodiversidá del Principáu que modifique la resolución, onde s'anuncia'l futuru trazáu de la nueva carretera AS-17, Avilés-Puertu Tarna, pa la conexón per autovía ente Avilés y Llanera.

   Pa los ecoloxistes resulta sorprendente que "na resolución ambiental se proponga como alternativa de pasu la opción 6 nel tramu Villalegre-Mollada, que pasa penriba de L'Escañoriu en Corvera, sin atender a los importantes valores naturales de la zona, que se veríen dañaos de manera importante".

   El colectivu recordó qu'esta zona ye una garganta producida pol ríu Molleda al orientase sobre una fractura del terrenu o falla, asitiada ente los picos Castiello y Álvaro por un llau, y l'altu de Grandellana pel otru. Esti accidente xeolóxicu dase sobre un sustratu rocosu compuestu por cuarcites formaes hai aproximadamente 500 millones d'años. Según los ecoloxistes, en nengún momentu se cita nel documentu ambiental publicáu nel Boletín Oficial del Principáu "l'impautu nesti paraísu ambiental, onde hai polo menos 21 especies protexíes pola llexislación internacional, estatal y rexonal".

   Pa los ecoloxistes, "ye tal la so importancia ambiental que'l propiu Conceyu de Corvera solicitó al Principáu la so inclusión como Monumentu Natural na próxima revisión del Plan d'Ordenación de los Recursos Naturales d'Asturies, que se lleva posponiendo dellos años".

   El colectivu insistió en que'l llugar presenta un "notable valor ambiental", como recueye nel Plan Especial de Proteición de la Garganta de L'Escañoriu, publicáu nel BOPA'l pasáu 19-12-2002.