L'Institut d'Estudis Catalans (IEC) acaba publicar un informe ellaboráu por Eva Pons y Natxo Sorolla sobre la situación de la llingua catalana ente los años 2005 y 2007, que recueye, sobre too, la influencia que les reformes de los estatutos tuvieron en materia llingüística, y critica duramente la "política secesionista" de la Comunidá Valenciana al considerar el valencianu como llingua propia.

   Ente los puntos positivos, l'IEC destaca la reforma del Estatutu de Cataluña, que reconoció, "con un ampliu consensu", el catalán como llingua propia, equipáralu col castellán y exixe'l deber de conocencia. Tamién sorraya les "renovaes collaboraciones" coles Isles Baleares y la entrada d'Andora na refundación del Institut Ramon Llull (IRL).

   En cuanto a los aspeutos negativos, l'informe llamenta que cola reforma estatutaria del 2006 la Comunidá Valenciana considere'l valencianu "llingua propia", y critica que'l Partíu Popular siga "dominando les instituciones" y reivindicando la "individualidá" del valencianu sobre'l catalán.

   Nesti sen, l'informe cita a l'Academia Valenciana de la llingua, que reafirmó la unidá de la llingua y l'anulación per parte del Tribunla Supremu de la orde que torgaba homologar los títulos de catalán. Amás, tamién critica la falta de "profesoráu cualificáu llingüísticamente" y la ufierta "insuficiente" de llinies en valencianu nes escueles.

   Nes Isles Baleares, l'IEC detecta un cambiu de tendencia importante al acceder al gobiernu el Pacte de Progrés (PSIB, UM y otros partíos), tres l'anterior gobiernu del PP. L'informe considera que'l cambiu frenó dalgunes iniciatives destinaes a "reducir la catalanización de la cadena pública de televisión IB3", y a "debilitar la exixencia llingüística a los funcionarios".

   Amás, l'informe llamenta que la reforma del estatutu d'Aragón nun incluyere la oficialidá del catalán y l'aragonés, asina como la situacion "estancada" del catalán en L'Alguer (Cerdeña) y les rexones franceses de Llenguadoc-Rosselló, onde según l'IEC, el so presidente "encabeza polémiques pa facer más periférica la llingua catalana".

   L'informe tamién recueye datos absolutos en cuanto a númberu de falantes, y indica que 11.011.168 persones nos territorios de llingua catalana entienden el catalán, mientres que 9.118.882 declaren saber falalu, lo que confirma, según l'IEC, la posición del catalán ente les llingues "medianes" d'Europa.