Soxepsa evita esclarar quién decidió nun remitir información a Sindicatura y el PSOE recuerda que nun hubo illegalidaes

El xerente de la Sociedá Mista de Xestión y Promoción del Suelu d'Asturies (Soxepsa), José María Quirós, evitó esclarar quién tomó la decision y en qué términos de nun remtir a la Sindicatura de Cuentes la documentación solicitada pa la ellaboración del so informe definitivu sobre los contratos d'alta direición del "sector públicu rexonal del Principáu d'Asturies". El PP entrugó pol asuntu, igual que, dempués el PSOE, qu'insistió. Sicasí, Quirós, en coherencia colo qu'argumentare hasta'l momentu nuna declaración nel Parlamentu asturianu, señaló que nun taba autorizáu polos órganos de Gobiernu de Soxepsa pa dar esa información. Los socialistes recordaron que l'órganu fiscalizador nun detectó illegalidaes nestos contratos.

   Quirós foi ún de los aproximadamente setenta declarantes que pasaron pela Comisión d'Economía y Facienda de la Xunta Xeneral del Principáu d'Asturies, nuna sesión que duró casi cinco hores. Poro, tomaron parte representantes d'organismos autónomos, entes públicos, fundaciones y empreses públiques del Principáu.

   El mencionáu informe de la Sindicatura entiende que de los 71 contratos d'alta direición (CAD) vixentes a 31 d'avientu del 2006, un total de 43 nun axunten los requisitos establecíos nel Real Decretu 1382/1985, pa que puean ser consideraos como tales, debiendo reordenase como rellaciones llaborales ordinaries o nel so casu funcionariales o estatutaries, dependiendo de la naturaleza xurídica del ente. Amás, l'informe detecta significatives diferencies nos pagos, dao que'l rangu salarial ta ente los 33.995 euros y los 124.637 euros.

   El PP, promotor de la Comisión, plantegó les preguntes entrugando a cada representante de les diferentes instituciones pol presupuestu del 2006, el númberu d'emplegaos y el sueldu percibíu polos dirixentes nesi periodu. Al llegar el turnu a Soxepsa, el PP recordó que la entidá figuraba como una de les entidaes que nun remitiere información. José María Quirós refugó contestar y argumentó que nun tenía l'autorización pertinente per parte de los órganos de Gobiernu de la sociedá pa proporcionar esa información. "Soi un simple emplegáu de la sociedá", dixo.

   Quirós esplicó que Soxepsa, anque tenga mayoría pública, ye una sociedá de derechu priváu, de carácter mercantil que trabaya nel mercáu, y que nun ta nos presupuestos rexonales. En rellación a si ha tar fiscalizada pola Sindicatura, Quirós señaló qu'hai dudes porque existe llexislación nun sen y n'otru.

   El diputáu del PP, Ramón García Cañal, criticó, sin embargu, eses dudes, y afirmó que la sociedá ye fiscalizable, porque ye pública, y en consecuencia afirmó que taba "en rebeldía". El so compañeru de partíu, Agustín Cuervas-Mons, añadió que Soxepsa tien capacidá pa espropiar, pero Quirós retrucó qu'otres empreses privaes como HC o concesionarios de carreteres tamién puen facelo.

NUN HUBO ILLEGALIDAES

   El diputáu del PSOE, Álvaro Álvarez cargó pela so parte contra la estratexa de "confusión permanente" del PP, y dixo que l'informe definitivu de la Sindicatura sobre los contratos d'alta direición del sector públicu rexonal nel 2006 nun detectó nenguna illegalidá.

   El voceru socialista señaló que lo que fai la Sindicatura nel so informe ye realizar recomendaciones "en dalgunos casos aceptables y n'otros discutibles". Asina, criticó'l "exhibicionismu" del PP al llamar a declarar a les persones que tienen un contratu d'alta direicón y pidi-yos responsabilidaes. "Ye absurdo, nun son ellos los que decidieron les condiciones de los sos contratos, en tou casu diba tener que declarar l'alministración que-y fizo esi contratu", señaló.

   De fechu, Álvarez llamentó'l desarrollu de la sesión que, pese a la so llarga duración, supunxo un "fraude" porque nun contribuyó a la meyora del informe nin a esclarar nengún de los aspeutos que se traten nel mesmu. Faló amás de "abusu" per parte del PP por llamar a declarar hasta a los que nun tienen un contratu CAD. P'Álvarez, los contratos CAD nun signifiquen ventaya dalguna, nin meyores salariales o llaborales. "Nun ye un privilexu", señaló.

   Amás, recordó al PP que la Xunta tovía nun emitió un votu favorable al informe de la Sindicatura de Cuentes, polo que tovía nun constitúi una recomendación efeutiva pal Gobiernu del Principáu. Sobre les entrugues sobre les cantidaes que cobren los CAD realizaes polos diputaos del PP, Álvaro Álvarez dixo qu'espera qu'esa mesma tresparencia la tenga'l diputáu 'popular' Ramón García Cañal, a la hora d'esplicar a últimos d'añu lo que cobró pol so trabayu, incluyíes los sos llabores de representación, nuna clara alusión al reciente nomamientu de García Cañal como conseyeru de Caxastur.

   Pela so parte, el voceru d'IU-BA-Verdes, Jesús Iglesias, dixo que la sesión de güei yera prescindible porque nun tenía munchu sen que tantes persones se presentaren nel Parlamentu p'aportar unos datos que la Sindicatura yá tuviere oportunidá d'evaluar y, hasta, espeyalos nun informe. Mostró les sos dudes y convidó a la reflexón sobre esi tipu de comisiones que "revisen" los trabayos de la Sindicatura.