L'Asociación de Normalización Llingüística refuga la convocatoria d'una plaza en Covera por falta d'oxetividá y temariu

|

L'Asociación de Trabayadores de la Normalización Llingüística d'Asturies refugó güei públicamente la convocatoria d'una plaza de 'responsable de la Casa de la Llingua del Conceyu de Covera' por nun haber temariu concretu nin exames, sólo una valoración de méritos y una entrevista personal, lo cual considera falto d'oxetividá.
   El colectivu protesta porque nun se cumplieron "los mínimos demandaos por esta asociación y que se cumplieron na mayor parte de los procesos de seleición d'otros servicios de normalización, un exame escritu y un exame oral, amás de la valoración de méritos".
   Según un comunicáu, al que tuvo accesu Europa Press, "nun se pide nenguna de les titulaciones que nesti momentu hai n'Asturies pa demostrar dagún tipu de formación académica en llingua asturiana: títulu d'espertu o especialista o los cursos de l'Academia de la Llingua Asturiana". "Van valorase unos xenéricos cursos de llingua asturiana, lliteratura o cultura asturiana", afirmó.
   "Nun hai temariu dalu, pero sí se diz que na entrevista curricular va afondase en distintos aspectos de la cultura asturiana y del procesu de normalización sociollingüística", esplica la organización, pa la que "hai maneres más oxetives y contrastables pa valorar la capacidá d'una persona en normalilzación sociollingüística".
   A lo último, el colectivu recordó que sigue naguando pola "creación de la plaza pa un Serviciu de Normalización Llingüística en Corvera". "Si con esta convocatoria se quier cubrir esi perfil de trabayador paezmos que se trabaya por dir nel sen contrariu d'afitar institucionalmente'l trabayu de la normalización de la llingua asturiana", acaba la nota.

Contador Estadistiques