Riopedre destaca la "importante presencia" de la llingua nes aules con 21.450 alumnos en Primaria y Secundaria

El Conseyeru d'Educación y Ciencia, José Luis Iglesias Riopedre, inauguró ayeri la I Sestaferia del Profesoráu de Llingua Asturiana: 'Xornaes de desarrollu curricular y didáctitu', y destacó la "importante presencia" del asturianu y nes aules del Principáu, onde estudien la materia 17.000 alumnos de Primaria y 4.450 de Secundaria.
 
Les xornaes, organizaes pol Centru del Profesoráu y de Recursos d'Avilés, van prollonganse hasta mañana y van valir pa presentar a los 120 profesores participantes nes distintes ponencies, asina como pa favorecer coloquios sobre aspeutos rellacionaos cola enseñanza de la llingua asturiana, los aspeutos metodolóxicos, l'usu de les nueves teunoloxíes, y demás temes.
 
El titular d'Educación señaló que'l 91% de los centros d'Educación Primaria (un total de 228) ufierten Llingua Asturiana, una materia que cursa'l 55% del alumnáu d'esta etapa y qu'imparten 178 profesores. En cuanto a Secundaria, el 90% de los centros (75 en total) imparten la materia con 75 docentes especializaos.
 
"Dende 1984, cuando entamamos a ofrecer la materia de manera esperimental en seis centros de Primaria, hasta güei, hubo un desarrollu importantísimu de la llingua asturiana nos centros educativos", señaló'l Conseyeru.
 
"La Conseyería d'Educación del Principáu d'Asturies ta faciendo una apuesta clara y decidida por esparder la enseñanza de la llingua asturiana y del gallego-asturianu. Tanto ye asina, que nun esaxero nada al afirmar que'l procesu d'escolarización del asturianu pue considerase un factor mui importante de normalización dientro'l procesu de recuperación llingüística", apuntó Riopedre demientres la so intervención.