ArcelorMittal, sancionada con 150.000 euros por un vertíu na ría d'Avilés tres una denuncia d'UNA

|

El Ministeriu de Mediu Ambiente y Mediu Rural y Marín (MARM) sancionó a la empressa ArcelorMittal España S.A. con 150.000 euros y la obligación d'indemnizar polos daños causaos al dominiu públicu hidráulicu con 1.380.15 euros, pola apaición de manches de vertíos d'hidrocarburos nel cauce de la ría d'Avilés, según consta nuna Resolución del Ministeriu con fecha de 4 de mayu.

   Según informó la formación política Unidá Nacionalista Asturiana (UNA) al traviés d'una nota prensa, la resolución llega dempués de la denuncia qu'interpunxo por unos vertíos que se produxeron el pasáu mes d'abril agües arriba del Hospitalillo nel colector 41, xusto debaxo del Puente Azud, onde vierte la planta de llaminación d'Arcelor, amás d'otres industries del polígonu de la ría.

   UNA alertó de los "continuos atentaos" de la empresa contra'l mediu ambiente y señaló qu'ArcelorMittal acumula más de 20 vertíos asemeyaos nel últimu mediu añu. Asina, exixeron a la empresa que cumpla coles sos obligaciones, y a les instituciones correspondientes que "vixilen con llupa" les sos actividaes imponiendo sanciones exemplares.

   A lo último, la formación política recordó que se trata d'agües nes que les alministraciones invirtieron 162 millones d'euros pa la so llimpieza. "Ye una formación sin grandes recursos nin medios la que tien que tomar cartes nel asuntu, cuando les alministraciones, el gobiernu y la oposición s'enllenen la boca con discursos sobre'l caltenimientu y el mediu ambiente, pero nun actúen ante casos tan graves con rapidez y dilixencia", acabaron dende UNA.

Contador Estadistiques