Los surfistes van manifestase contra’l dragáu de la Ría de Villaviciosa

"Les federaciones asturiana y española de surf convoquen una manifestación de protesta contra la entrada de la draga na Ría de Villaviciosa, una actuación rellacionada cola adaptación de los cais d'El Puntal pa la entrada de barcos y yates de recréu y que los amantes del surf, que tien na playa de Rodiles ún de los sos santuarios europeos, refuguen claramente. Los amantes de Rodiles tán llamaos a la mesma playa a les 12 del mediudía d'esti sábadu 3 de febreru. El lema de la concentración ye ""non al dragáu, en Rodiles Cabemos toos"".

La Federación de Surf condenó'l proyectu yá de la qu'entamó a falase d'ello'l pasáu branu, asegurando que les foles de Rodiles ""desapaeceríen col sable que se dragare y con ello la meyor fola d'Asturies"". La Federación de surf asegura qu'El Puntal inxértase nel paisaxe protexíu de la Ría de Villaviciosa y por ello tolos particulares dueños de barcos han saber que lo importante ye'l caltenimientu del ecosistema del llugar"" alegando amás que nun esiste siniestralidá de barcos que xustifique la operación y que la dinámica de marees del llugar fai que'l supuestu problema pa la entrada y salida de barcos namás se presente unes poques hores al día en tiempu de marea viva. L'alcalde de Villaviciosa Asensio Cobián defende la draga, una operación a la que nun s'opón el Conseyeru de Mediu Ambiente Francisco González Buendía. Dende'l PSOE de Maliayo asegúrase que ye posible concasar la práctica del surf cola navegación y qu'existe una solución intermedia.

La Federación, que recuerda col lema ""en Rodiles cabemos toos"" que nun s'opón a la presencia de barcos, argumenta que la barra de Rodiles esiste dende va más de 200 años, documentándose la entrada de barcos nella hasta'l presente ensin falta de draga nenguna. La federación remítese tamién al casu de la playa vasca de Mundaka, otru santuariu del surf onde se fexo una draga de gran volume que dexó la playa inútil pal surf a iniciativa d'unos astilleros. Trés años, les dinámiques marines recuperaron los cerca de 240.000 metros cúbicos de sable que se llevaren artificialmente, tornando la situación de la playa a la normalidá.
Más información na web de la Federación de Surf"