El meyor Uviéu nun pudo cola Cultural y métese en puestu de descensu

"L'Uviéu xugó un bon partíu, sobre too na primer parte, pero una gran cantada de la defensa y del porteru azul ficieron que l'equipu nun pueda ganar y se meta en puestu de descensu. Velázquez presentó un equipu coles novedaes de Moisés, qu'entró pol sancionáu Jacobo, y el debú nel Tartiere del llateral Guerra. L'equipu azul entró con ganes nel partíu, con opciones nes bandes, teniendo'l control de la pelota y buscando con decisión la portería de la Cultural. Presionando bien y moviendo'l balón con rapidez y criteriu fueron llegando les ocasiones. Asina, nel minutu 14 una bona aición d'ataque uvieina permitió que la meyor versión de Michu ficiera'l 1-0. El canteranu recuperó'l balón y dempués de delles combinaciones con Pepín y Sergio Sánchez, Michu garró'l pelotu fuera l'área y sacó un trallazu qu'entró per tola escuadra, un golazu de los que va tiempu nun se víen nel Tartiere.

Dempués del gol l'Uviéu relaxó la presión y el númberu d'ocasiones azules fue baxando pero tampoco los de Lleón nun llegaben con nengún peligru a la portería de Gastón. Pero llegó l'últimu minutu de la primer parte y tamién llegó otra vuelta una gran cantada de la defensa y del porteru azul pa que Riera rematara solu dientro l'área pequeña y ficiera l'empate llevando l'enfadu a una afición qu'entamaba a reconciliase col equipu.

El gol nun-y sentó bien al Uviéu y na segunda parte costó-y muncho trabayu crear ocasiones, poniéndo-y ganes pero con poca cabeza empezaron a llegar los fallos y los de la Cultural taben cada vez más cómodos nel campu. Nel minutu 25 y dempués de la espulsión d'Alberdi la Cutural quedó con 10 pero los azules nun fueron a facer el gol que-yos diera los tres puntos. Velázquez fizo cambios y metió a Miguel y R. Castillo, esti últimu tuvo dos clares ocasiones nos minutos 33 y 38 pero nes dos s'atopó con un seguru Aulestia qu'impidió la victoria azul. La cosa entá pudo ser peor si N. García nun ye a sacar un balón que Riera remató nel saque d'un córner. Con un Uviéu moviendo la pelota atrás, ensin sentíu y ensin llegar al área lleonesa fueron pasando los minutos hasta rematase otra deceición pa l'afición azul. Un equipu al que tanto-y cuesta facer gol nunca nun pue permitise los fallos defensivos que vienen teniendo los azules, los resultaos tán claros. Nun queda más qu'esperar lo que pase'l próximu xueves y pidir que lleguen pronto los refuerzos y que seyan munchos…"