L'Efmo.com ganó por muncha diferencia al Canoe

"L’Efmo.com algamó una victoria perimportante, por 57 a 65, nel campu del Canoe, rival direutu na llucha polos “play-off” d’ascensu. Les avilesines son terceres empataes a once victories coles segundes, el Zamora, y a una victoria del Badajoz que ye'l primeru. L’equipu avilesín fizo una gran defensa, que dexó al equipu madrileñu en 57 puntos. Amás nestu alcuentru volvió Berta Siñol, que fuera baxa nos últimos partíos por enfermedá, y qu’amás tocó-y defender a Laura García, una de les meyores xugadores locales.

Jerica Watson fizo un gran alcuentru y un gran trabayu, tanto en defensa como n’ataque. La primera parte foi igualada y al descansu llegóse con una ventaya de dos puntos, 28 a 30. Tres el descansu les asturianes llegaron a tener ventayes d’hasta once puntos nel tercer cuartu y caltuviéronla, lo que-yos valió pa ganar el partíu ensin problemas. Nel equipu avilesín la meyor foi Jerica Watson (fizo dobles figures -14 puntos y 16 rebotes-, dio 4 asistencies, recuperó 5 balones y perdió 4, ficiéron-y 6 faltes personales y tuvo la meyor valoración del alcuentru con 36 puntos). Tamién hai de destacar a Dace Cinite ( 15 puntos, 5 rebotes, 2 balones perdíos y ficiéron-y 3 faltes personales). Nel equipu local destacaron Rita Esther Montenegro (tamién fizo dobles figures -16 puntos y 16 rebotes-, 1 asistencia, 5 balones recuperaos y 7 perdíos, ficiéron-y 2 personales y tuvo una valoración de 22 puntos) y Laura García (25 puntos, 3 rebotes, 2 asistencies, 2 balones perdíos, 4 balones perdíos, punxo 1 tapón y ficiéron-y 4 faltes personales).

Ficha téunica:

Real Canoe N.C.: Montserrat Antón (3), Sara Castrillo, Tatiana Castro (2), Laura García (25) y Rita Esther Montnegro (16). Tamién xugaron: Ester Castaño (5), María Piera y Sheila Mangada (6).

Efmo.com: Berta Siñol (5), Orinta Kavaliauskaite (7), Devon Campbell (8), Dace Cinite (15) y Jerica Watson (14). Tamién xugaron: Paula Fernández (10), Mayte Riera, María Isabel García (4) y Debora Abreu (2).

Árbitrios: Ángel González y David Vázquez. Nel Efmo.com nun hebo xugadores eliminaes por cinco personales, nel equipu madrileñu foi eliminada Sheila Mangada. Partíu de la decimoquinta xornada de la Lliga Femenina 2, xugáu nel Real Canoe N.C. de Madrid. Parciales per cuartos: 12-17, 16-13, 12-17 y 17-18."