El Gobiernu asturianu va inaugurar la estación d'esquí d'Ayer el 3 de marzu

"La estación d'esquí ""Fuentes de Invierno"" asitiada en Puirtu Braña, nel Altu Ayer, ún de los proyectos nos que más invirtió la Conseyería de Cultura nesta llexislatura, va entamar a funcionar el próximu 3 de marzu, según dio anuncia d'ello'l director de Deportes del Gobiernu asturianu Daniel Gutiérrez Granda.

Con 8 kilómetros esquiables de los venti que tien proyectaos y con un remonte que la va conectar cola estación d'equí lleonesa de San Isidro, que ta pa la otra fastera de la cordal, la segunda estación d'esquí asturiana va entamar a funcionar demués de munchos retrasos y va facelo, por de pronto, en periodu de preba con vistes a detectar fallos y igualos na temporada d'esquí 07-08, polo que la entrada va ser de baldre pa los esquiadores federaos y pa los aficionaos que tengan el ""forfait"" de la estación de Payares. La xestión de la estación va correr al cargu de la empresa de capital públicu ""Recrea"" que Gutiérrez Granda diz que va crear nel equipamientu cerca de 100 puestos de trabayu directos. El presupuestu total de la estación allégase a los 42 millones d'euros, 7.000 millones de les antigües pesetes.

Les obres de la estación d'esquí recibieron dende'l primer momentu en qu'entamó a falase del proyectu les crítiques de grupos ecoloxistes, que denunciaron delles vegaes, incluso nos tribunales, irregularidaes na execución de la construcción y que refuguen afechu la estación d'esquí al abultá-yos que ye inviable nun contestu como l'actual en que'l cambéu climáticu va facer cada añu más difícil cubrir les espectatives de ñeve. El papel de la estación como muria que va separtar a les poblaciones occidental y oriental d'osu pardu, y que va afectar a los cantaderos de faisán montés, tamién merez la crítica de los ecoloxistes."