El Farho Xixón Baloncestu entamó l'añu ganando

"El Farho Xixón Baloncestu ganó al Burgos pol resultáu de 90 a 84 y con ello ruempe con una riestra de diez derrotes y una victoria nos últimos once partíos. Los xixoneses llegaron a ganar por quince puntos, nel segundu cuartu, y nos últimos minutos del alcuentru complicóse-yos al averase'l contrariu nel marcador, pues llegó a ponese a trés puntos. Esta victoria,la sétima, saca al equipu de los puestos de descensu direutu –nel que ta’l Tenerife con seis victories, anque conun partíu menos-y de los puestos de”play-off”de descensu –onde tán Gandía, con siete victories, y Burgos con seis-.

Los xixoneses nun foron asalvar el “basket-average” pues ganaron por seis puntos y ello déxalu del llau de los castellanos, pues nel so campu ganaron por once puntos y pue ser importante nel casu d'empate final na clasificación. El partíu entamó con una ventaya del equipu foriatu por cinco puntos, 2 a 7, pero un parcial de 6 a 0 pa los xixoneses punxo un 8 a 7 nel marcador. Lo Grippo metió al so equipu nel alcuentru y algamaron un parcial de 0 a 6, poniendo un 8 a 13.

Entá'l Burgos pudo marchase nel marcador, pues otru parcial de 0 a 6, dexó'l lletrónicu nun 10 a 17. Ehí Joaquín Prado pidió tiempu muertu y les coses cambiaron, pues los asturianos, con muncha rapidez ya intensidá, averáronse y volvieron a ponese delantre con un 21 a 19, tres un triple de Bigelow. Dempués Dani López, con un tiru llibre, subió'l 22 a 19. Nel segundu cuartu los locales frayaron el partíu y nel entamu ficieron un parcial de 10 a 0, con un 32 a 19. Los burgaleses nun desfondaben gracies al aciertu de Lo Grippo, que metió seis puntos siguíos, dempués de tar más de cuatro minutos ensin meter nengún puntu. Los foriatos nun yeren a parar a los xixoneses, que amás yeren los amos del rebote.

L'entrenador castellanu, Ñete Bohigas, pidió tiempu muertu, pero ello nun-y valió y la ventaya foi a quince puntos, 43 a 28, tres un tiru llibre encestáu por Waleskowski. Los locales movíense con ventayes cómodes d'ente catorce y doce puntos. Al descansu llegós con un 51a 39. Al entamu'l tecer cuartu Waleskowski enanchó la ventaya a los catorce puntos, 53 a 39, pero Lo Grippo echóse otra vegada l'equipu al llombu y con once puntos siguíos -d'ello tres triples- púnxolos a trés puntos, 55 a 52. Amás los burgaleses defendíen meyor y les ventayes diben de los cinco a los trés puntos. Entós Prado fizo'l cambéu de Rubén Suárez por Dani López, que nun taba mui afortunáu, y la ventaya volvió a los diez puntos, 66 a 56 y 68 a 58. Rubén Suárez aumentóla a once, 70 a 59, anque Lo Grippo dexóla ern nueve.

Esti xugador metió trece puntos nel periodu y finó con un marcador de 70 a 61. Nel últimu periodu Lo Grippo y Esmorís tuvieron perbien, asina Esmorís metió siete puntos siguíos pal Burgos poniéndose a cinco puntos , 77 a 72. Iturbe volvió a llevar la ventaya a los nueve puntos, 81 a 72, pero Tony Smith y y Matías Sandes acurtiáronla a trés. Ehí hebo una xugada perimportante cuando Chus Poves perdió'l balón nel mediu campu y Morales foi sólu pal aru xixonés, anque Bigelow estórbolu, y falló. Darréu Poves encestó de trés y la ventaya foi de seis, 88 a 82, faltaba un minutu pa finar. El partíu decidióse pa los locales neses dos xugaes.

Los xugadores más destacaos nel equipu local foron Keith Waleskowski (fizo dobles figures -23 puntos y 17 rebotes-, recuperó 1 balón, perdió 3, punxo 1 tapón, ficiéron-y 3 faltes personales y tuvo la meyor valoración del alcuentru con 35 puntos), Chus Poves (16 puntos, 3 rebotes, 3 asistencies, 2 balones recuperaos, 2 balones perdíos, punxo 1 tapón y ficiéron-y 1 falta personal), Antxon Iturbe (12 puntos, 5 rebotes, 2 asistencies, perdió 2 balones y ficiéron-y 3 faltes personales) y Mark Bigelow (14 puntos, 2 asistencies, recuperó 2 balones y perdió 1, amás ficiéron-y 3 faltes personales). Nel equipu castellanu'l meyor foi Diego Lo Grippo (31 puntos, 11 rebotes, 2 asistencies, recuperó 1 balón y perdió 3, punxéron-y 1 tapón, ficiéron-y 5 faltes personales y tuvo una valoración de 33 puntos). Tamién destacaron nos foriatos José Ramón Esmorís (15 puntos, 6 rebotes, perdió 2 balones y ficiéron-y 3 faltes personales) y Tony Smith (14 puntos, 2 rebotes, 5 asistencies, recuperó 1 balón y perdió 2 y ficiéron-y 5 personales).

Ficha téunica:

Farho Xixón Baloncestu: Dani López (8), Peter Rajniak (5), Mark Bigelow (14), Isma Torres (8) i Keith Waleskowski (23). Tamién xugaron: Chus Poves (16), Rubén Suárez (4), Anton Iturbe (12) y Dani González.

Autocid Ford Burgos: Tony Smith (14), Juanmi Morales (7), Matías Sandes (10), Diego Lo Grippo (31) y Steve Horton (2). Tamién xugaron: Peter Loran (5), José Ramón Esmorís (15), Juan Sartorelli, Jiri Okac y Pedro Nuno.

Árbitrios: Ricardo Bernardo Santana y Antonio Manuel Zamora. Nel Farho Xixón Baloncestu nun hebo xugadores eliminaos por cinco faltes personales, nel Burgos foi elimináu Juanmi Morales (minutu 39). Partíu de décimo octava xornada de la Lliga Adecco LEB, xugáu nel Palacio de los Deportes de La Guía, cola asistencia d'unes mil quinientes persones. Parciales per cuartos: 22-19, 29-20, 19-22 y 20-23"