L'occidente pierde un escañu na Xunta Xeneral

Los datos del padrón del Institutu Nacional d'Estadística (INE) confirmen que la perda de población del occidente asturianu va llevar arreyada la perda d'un escañu a la Xunta Xeneral del Principáu a escoyer nesta circunscripción electoral a favor de la central. L'occidente, qu'escoyía hasta agora siete escaños y que llegó a tener 8 representantes na cámara autonómica, baxa a seis asientos na Xunta Xeneral, mientres que'l centru xube de 33 a 34 escaños. L'oriente queda, como taba hasta agora, con cinco.

El repartu d'escaños pel occidente suel resolvese con un 4 a 3 que favoreció al PSOE nes últimes autonómiques. El bipartidismu d'esta circunscripción namás lu franció nos últimos años la URAS, que llogró nel 1999 un escañu por esta circunscripción, xunto colos otros dos que consiguiere na central. De repetise los resultaos electorales de la última convocatoria del 2003, l'occidente daría 3 escaños a repartir pa cauna de les dos formaciones mayoritaries n'Asturies.