Trés voces asturianes pa Europa

|

A dos díes de la convocatoria electoral europea, Asturies.com ufre a los sos llectores la visión que d'estes elecciones tienen los trés candidatos de fuerces polítiques asturianes. Pablo Fernández, candidatu del Bloque por Asturies (integráu na coalición d'Izquierda Unida), Daniel Fernández, candidatu d'Unidá Nacionalista Asturiana, y Mariu Arbesú, candidatu d'Andecha Astur, respondieron a trés preguntes claves nesta cita con Europa.
 
 
 

Pablo Fernández Fernández (Lluanco, 1969). Candidatu pol Bloque por Asturies (Izquierda Unida- Bloque por Asturies) ye Portavoz Nacional de BA y conceyal en Gozón. Ye Espertu en Mediación y Conflictos.

1- ¿Qué representen pa los asturianos estes elecciones europees?

Estes ellecciones suponen una oportunidá pa que los ciudadanos puedan camudar aquelles coses que nun-yos presten. Dende llueu, cola suma de votos pueden configurase fuerces polítiques qu'influyan col so programa nes acciones de gobiernu y polo tanto na vida cotidiana de los ciudadanos y ciudadanes. Hai que tener en cuenta que´l 70% de la llexislación del país tien el so orixen en directives europees.

2- ¿Cuála ye la to valoración de l'actuación n'Europa de los partíos mayoritarios n'Asturies (PSOE y PP)?

El PP y el PSOE comparten la defensa del modelu neolliberal. La prueba d'ello, ye que'l PSOE yá anunció que dempués d'estes ellecciones va a da-y el so sofitu a D. Barrosu, mayordomu de "les Azores" y defensor de les polítiques de dereches. Defienden el covandonguismu n'Asturies y el sacro imperiu romanu n'Europa.

3- ¿Cuáles son les principales razones poles que los asturianos deben votar a Izquierda Unida-Bloque por Asturies esti próximu 7 de xunu?

 Hai trés razones fundamentales:

- Defendemos un cambiu de modelu socioeconómicu, basáu na producción frente a la especulación, la estabilidá llaboral frente a la "flexibilidá" y la defensa de los derechos llaborales frente a la precariedá.

- Esti modelu socioeconómicu tien que sofitase sobre unos criterios éticos que tengan supremacía sobre los mercantiles: defensa de la Carta de los Derechos Humanos.

- Defendemos la bayura de los pueblos que constituyen Europa coles sos identidades y llingües. Por consiguiente, caltenemos un discursu nacional asturianu especícficu en Bruxeles.
 
 
 
Daniel Fernández Blanco (Xixón, 1978). Candidatu d'Unidá Nacionalista Asturiana.Ye llicenciáu en CC. Polítiques y de la Alministración y fue becariu d’investigación na Universidá de Santiago de Compostela algamando’l diploma d’Estudios Avanzaos en Procesos Políticos Contemporáneos. Per otru llau cuenta con un máster n’Auditoría financiera y ye especialista en Derechu Tributariu y Llaboral pola universidá compostelana. Anguaño trabaya nun despachu profesional en temes d’asesoramientu. Responsable d’Attac en Santiago de Compostela, militó en dellos colectivos d’esquierda y a la vuelta a Asturies integróse n’UNA, formando parte anguaño de la Executiva Nacional, cuntando coles responsabilidaes d’Ayalguería de la organización y siendo amás voceru de la estaya de Vivienda.

1- ¿Qué representen pa los asturianos estes elecciones europees?

N’Unidá Nacionalista Asturiana queremos que seyan una oportunidá pa qu’entame a desarrollase un cambiu nel murniu escenariu electoral d’esti país y sobre manera un cambiu de mentalidá. Anque’l desinterés y l’apatía pa con estes elecciones ye l’actitú mayoritaria de los asturianos y asturianes, nun deberíemos dexar vencer por esa galbana política. Y esto ye sobre too porque a quien más interesa que les asturianos y asturianos nun vayan votar son los partíos mayoritarios, aquellos a los que la situación actual-yos resulta cómoda. La sociedá asturiana tien de decatase de que la Unión Europea cada vez inflúi más nes nuestres vides, política medioambiental, derechos llaborales y sociales, protección de les naciones y les sos llingües y cultures...

Ye un bon momentu pa que s’entame a ver qu’hai una fuerza asturiana, ensin dependencies, que pue a mediu plazu convertise nuna alternativa al modelu de PSOE y PP, que comparte IU.

2- ¿Cuála ye la to valoración de l'actuación n'Europa de los partíos mayoritarios n'Asturies (PSOE y PP)?

Nesti país podríemos facer un tour turísticu nuevu nel que se podríen visitar los despropósitos fechos colos fondos provenientes de la Unión Europea. Podríemos arrancar peles cuenques, con un cientu d’obres de maquillaxe, pero incapaces de tornar el procesu de degradación llaboral, económicu y social de les zones mineres, simbolizaes por un campus universitariu en Mieres qu’inda ta esperando a enllenar les sos aules. De siguío podíemos garrar una autovía minera, fecha a mayor gloria del famosu llider sindical, y llegar a Xixón onde podríemos garrar un barcu nun superpuertu que ye un auténticu sumideru de perres europees, colos costes y sobrecostes ensin desplicar.
 
Ye dicir, PSOE y PP, son artífices y complices d’una xestión de la política europea asturiana que namás se preocupó de fuegos artificiales nel gastu, pero que nun consiguió que dempués de más de 20 años de fondos europeos Asturies salga del so retrasu, ye dicir, marafundiáronse les perres. Y esto perduxica sobre manera a los sectores populares y a los trabayadores, especialmente a la mocedá que se ve obligao a emigrar ensin querelo n'abondos casos. PSOE y PP atienden más a interes foriatos, y de grupos de presión como’l de la construcción, en cuenta de parase a facer un analís de les necesides estructurales d’esti país, pa poder invertir eses descomanes cantidaes de dineru n'afalar un desarrollu económicu sostenible y de calidá. Arriendes de too esto, nun se conoz acción denguna pela parte d’estos partíos a la hora de dar voz a la identidá nacional d’Asturies. El nuestru idioma y el restu del corpus cultural asturianu tán güerfanos, pola cenciella razón de que los sos supuestos embaxadores nin los conocen nin los aprecien. 

3- ¿Cuáles son les principales razones poles que los asturianos deben votar a Unidá Nacionalista Asturiana esti próximu 7 de xunu?

Como dixi a lo primero, n’Unidá Nacionalista Asturiana queremos qu’estes elecciones seyan el primer pasu d’un camín que tien qu’acabar con qu’haya una voz política nesti país netamente asturiana y con pesu políticu a tolos niveles. N’UNA tamos llevando alantre un procesu nel que, pasu ente pasu, tamos algamando que se vea a esta organización como un sitiu pa trabayar nesti sen pola xente que cree nesti país, y que camienta que tien unos derechos nacionales, sociales y culturales que nun se tán respetando. Pa poder cambiar esta situación hai que trabayar na cai y deprender de los movimientos sociales y  hai que tar tamién nes instituciones pa voltiar les polítiques provincianes y sucursalistes que conderguen a la nación asturiana, como suxetu políticu, a la so desaparición.

Cada vez somos más y más convencíos de que vamos pel bon camín, pero necesitamos el sofitu de la xente que demanda una fuerza política asina pa ser a llegar a sectores más amplios de la sociedá asturiano que pueden ser receptivos pa un proyectu como'l que queremos. Pero pa que too eso se faiga cada vez más fuerte, más afitao, ye necesario tener el votu de la xente que ve necesariu un proyectu asina. Persabemos que nun vamos sacar un eurodiputáu pero con cada votu nestes elecciones y col trabayu d'equí en delantre podemos entamar a iguar la fuerza asturiana qu'esti país precisa.
 

Mariu Arbesú Iglesias
(Noreña, 1978). Candidatu d'Andecha Astur. Ye diplomáu en Maxisteriu pola Universidá d'Uviéu, ta sindicáu na Corriente Sindical d’Izquierda (CSI) y tien una llarga trayectoria política dientro d’Andecha Astur siendo’l so secretariu xeneral y candidatu a l’Alcaldía de Noreña en delles ocasiones.

1- ¿Qué representen pa los asturianos estes elecciones europees?

Asturies xuegase angüaño’l siguir esistiendo y resistiendo. Persabemos qu’estes elleiciones nun son democrátiques y va a haber una gran abstención. A los grandes partios nun-yos interesa que la xente vaiga a votar y faen timides campañes llamando a la participación, nós llamamos a participar y a movilizase y nesi sentiú va'l lema qu’escoyimos y tu.. vas quedar paráu?

2- ¿Cuála ye la to valoración de l'actuación n'Europa de los partíos mayoritarios n'Asturies (PSOE y PP)?

PP y PSOE son  partios españoles y aunque esistan n’Asturies enxamás nun defendieron nin defenderán los intereses d’Asturies. Da igual el marcu institucional onde mos pretendan representar, na Xunión Europea igual que nel restu de sitios, defenden esclusivamente los sos intereses como partiu y como clase política. Son los enemigos d’Asturies y de los y les trabayadores.

3- ¿Cuáles son les principales razones poles que los asturianos deben votar a Andecha Astur esti próximu 7 de xunu?

Andecha Astur ensin abandonar el so proyeutu de fondu ye pragmática nesti asuntu. Nestos años trabayemos abondo les rellaciones internacionales y tenemos n’Europa y nel estáu español el compromisu d’organizaciones polítiques aliaes nuestres que s’ocuparán de treslladar les nueses iniciatives a la Xunión Europea como vinimos faciendo hasta agora dende Europa de los Pueblos. Siguiremos esmoleciéndonos y ocupándonos de temes como’l superpuertu del Musel o la Zalia de Xixón. Tenemos forma de siguir faciéndolo al travies d’Europa de los Pueblos y habrá dos persones responsables d’Andecha Astur canalizando esto dende Madrid y Barcelona. Esta táctica tendrá repercusión n’Asturies necesariamente y seguirá poniendo al gobiernu del PSOE contra les cuerdes en munchos casos y yo creo que ye un bon motivu pa votar Andecha Astur.

Contador Estadistiques