La población empadronada n'Asturies algamó los 1.085.110 habitantes

Según los datos del Avance del Padrón Municipal, publicaos pol Institutu Nacional d'Estadística (INE), la cifra provisional de residentes n'Asturies s'asitia nos 1.085.110 habitantes, 4.972 más qu'a 1 de xineru del 2008. Con esti datu, el nuesu país foi una de les comunidaes autónomes que rexistró un menor crecimientu poblacional demientres 2008, con un incrementu del 0,5 por cientu, lo que l'asitia per baxo del incrementu estatal qu'algamó'l 1,1 por cientu, hasta los 46.661.950 ciudadanos.

En términos relativos, amás d'Asturies, los menores incrementos se dieron en Castiella y Lleón (0,1 por cientu), Estremadura (0,2 por cientu) y Galicia (0,4 por cientu).

   Por comunidaes autónomes, Andalucía sigue siendo la rexón con más habitantes d'España, con 8,2 millones empadronaos, siguida de Cataluña, con 7,46 millones y de Madrid, con 6,36 millones de persones empadronaes. Estes comunidaes rexistraron nel 2008 los dos mayores incrementos de población en términos absolutos.

   A 1 de xineru del 2009 había un total de 47.012 estranxeros empadronaos n'Asturies, lo que representa un 4,3 por cientu del total de la comunidá, y que supón que la población d'orixe estranxeru afincada creció a lo llargo del 2008 un 15,2 por cientu, en 6.208 persones. Trátase d'ún de los mayores incrementos relativos de población estranxera rexistráu n'España, sólo per detrás de Melilla (17 por cientu).

Estes cifres van ser provisionales hasta que l'Institutu Nacional d'Estadística eleve al Gobiernu estatal la propuesta de cifres oficiales de población, pa la so aprobación mediante Real Decretu, que va publicase nel Boletín Oficial del Estáu enantes de final d'añu.