Hugo Morán (PSOE) xustifica la llinia Lada-Velilla y la regasificadora como pasos hacia un modelu enerxéticu sostenible

|

El secretariu de Mediu Ambiente del PSOE a nivel estatal, Hugo Morán, xustificó güei la instalación n'Asturies de dellos equipamientos criticaos pol so impautu visual o'l so supuestu carácter contaminante, como la llinia eléctrica Lada-Velilla, o la planta regasificadora d'Aboño, como pasos hacia'l "modelu enerxéticu sostenible" que, según aseguró, defende la so formación.
 
Morán realizó estes declaraciones demientres el trescursu d'un alcuentru colos medios n'Uviéu pa defender el modelu de 'Una Europa Sostenible', que'l so partíu plantega de cara a les elecciones europees del próximu domingu, 7 de xunu.
 
El responsable socialista consideró per una parte que l'apuesta poles enerxíes llimpies conlleva la instalación de "Grandes infraestructures de tresporte". Per otru llau, definió la planta regasificadora, mui criticada por organizaciones ecoloxistes y asociaciones de vecinos, como una "transición" ente la producción enerxética con carbón y el modelu d'enerxíes renovables.
 
Según Morán, les renovables "fuxen de modelos de concentración". "Los grandes polos de concentración enerxética, como carbón, gas, o nuclear, requieren de poques infraestructures de tresporte, que sin embargu, son les que provoquen grandes refugos", señaló, pa matizar que "los modelos de producción d'enerxíes renovables son socialmente muncho más espardíos, polo que van multiplicase la necesidá de llinies de tresporte", del tipu de la llinia Lada-Velilla.
 
"Si queremos apostar por sostenibilidá, va haber qu'elixír ente contaminación atmosférica o l'impautu ambiental. Nun ye posible prescindir de les dos coses. Preferimos un modelu rellacionáu cola producción del carbonu o un modelu llimpiu que conlleva impautu visual", matizó.
 
Sobre la regasificadora, señaló que "nesa transición hacia un modelu d'enerxía renovable al 100% (que fechó nel añu 2050), nun ye posible prescindir  de les térmiques, les nucleares o les qu'usen combustibles fósiles", señaló. En dichu "modelu de transición", asitió la instalación n'Asturies d'esta planta, "compatible col cambiu de sistema".
 
Nesti sen, matizó que "necesitamos caltener modelos alternativos cuando se ta reduciendo carbón", porque "nun ye posible de la nueche a la mañana" prescindir d'ello. Amás, aseguró que la instalación d'un sistema de regasificación "ye l'alternativa" a depender del suministru gasísticu d'Europa del Este, en referencia a los problemes ente Rusia y Ucraña que conllevaron el corte del abastecimientu'l pasáu iviernu. "Ye un modelu que reduz les emisiones, nun ye pol que s'apuesta pal añu 2050, pero sí ún de transición", señaló.
 
CALIAO Y LA INCINERADORA
 
Na so defensa d'un modelu de desarrollu enerxéticu sostenible, Morán tamién xustificó la creación del embalse de Caliao, y la incineradora de Serín, como necesarios p'asegurar l'abastecimientu d'agua a la zona central d'Asturies y p'acabar cola fraición restu de residuos.
 
Sobre l'embalse, señaló que "l'área central d'Asturies va siguir creciendo", polo que "ye necesario incrementar la capacidá d'almacenamientu d'agua". Al so xuiciu, pue facese una "apuesta pola reducción del consumu y la minimización de perdes, o'l meyor aprovechamientu de los suministros, pero vamos tener que siguir tirando de les reserves".
 
Sobre la incineradora, señaló que "en materia de residuos, tenemos que pensar que, agotaos tolos procesos de reciclaxe o reaprovechamientu, va quedar siempre una fraición restu pa la que va haber que tomar una opción: valorización o vertederu". "Instalase na comodidá d'ampliar la vida d'un vertederu" afirmó, en referencia a les propuestes de los opositores a esta infraestructura, "ye treslladar el problema hacia alantre, y llanzalu a los que vengan detrás". "Necesitamos establecer tolos compromisos que seyan necesarios", añadió, en rellación a la reducción de residuos y el so reaprovechamientu, pero dexó claro que "nun va ser bastante".

Contador Estadistiques