La Xunta Electoral Central nun autoriza papeletes d'UNA n'asturianu "por nun ser llingua oficial"

La selmana pasada Unidá Nacionalista Asturiana presentó énte la Xunta Electoral Central un modelu de papeleta electoral d'esta formación billingüe, igual que'l que s'usa nel restu de las comunidaes con llingua propia, na que figuraba'l testu en castellanu y n'asturianu. Sicasí, la Xunta electoral refugó dar como válida la papeleta propuesta al incluyir testu n'asturianu y "nun ser ésta una llingua oficial".

Dende la UNA conseñen que "pretendíase ufiertar un modelo válidu de papeleta a tolos asturianos y asturianes que quixeren exercer el so derechu al votu utilizando la nuesa llingua y pretendíase (nel momentu de la so validación) unviala a tolos votantes qu'al traviés de la web la solicitaren pa votar asina a UNA n'asturianu. Ye importante recordar que al haber nestes eleiciones circunscripción única, pue votase a UNA non solo n'Asturies sinon en cualquier colexu electoral del estáu".

Esta mañana UNA recibió la negativa a da-y como válida la papeleta propuesta al incluyir testu n'asturianu y al nun ser ésta una llingua oficial. Dende UNA afiten que'l so "serviciu xurídicu alcuéntrase iguando un recursu que va ser tramitáu esta mesma tarde pa facer por tornar una decisión que Daniel Fernández (númberu 1 na llista a les eleiciones) calificó de discriminatoria y que coloca a los falantes d'asturianu y a toles persones que quieran utilizar la llingua propia d'Asturies, nuna situación d'inseguranza xurídica ya indefensión".