Bob Dylan y la so versión n'asturianu

Toli Morilla ye un cantautor avezáu a trabayar con poemes d'otres persones nos sos cantares. Arriendes d'él mesmu por supuestu, Morilla tien enllenáu los sos discos y espectáculos de la obra de poetes asturianos a los que-y pon música, como por exemplu nos dos últimos trabayos, Nueche d'insomniu y Entropía. Pero esta vegada'l músicu asturianu foi más llonxe a la busca inspiración, crució'l charcu y topó a Bob Dylan, un de los músicos y poetes más influyentes del sieglu XX, que va sonar n'asturianu nel próximu trabayu de Toli Morilla.
 
El discu, entituláu "Diez cantares de Bob Dylan n'asturianu", preséntase esti sábadu nel xardín botánicu de Xixón. Toli contará'l  trabayu que desendolcó pa facer esti discu, y ye qu'amás de facer el trabayu d'adaptación, tamién hebo que pidir permisu a la editorial Sony ATV, que xestiona los cantares del cantante norteramericanu, y que finalmente dio permisu pa espublizar les versiones feches. Ente los cantares escoyíos por Toli Morilla, tán pieces de distintes époques de la vida de Dylan, anque en casi tolos casos son temes representativos y conocíos de la so carrera. Asina, tenemos los perconocíos cantares "Hurricane" y 'Knockin' on heaven's door', xunta otros como 'Don't think twice, it's all right, 'One more cup of coffee' o 'Sara'. En toos ellos, Morilla enfrentóse a la complicada xera de llevar el testu del asturianu al inglés,  arriendes de facer la música qu'acompaña. Tocantes a esto último, nel cantar d'adelantu que yá podemos sentir nel Myspace del artista, Toli ye fiel a la música música orixinal del tema "Hurricane", colo que se puede albidrar que nel restu del discu se caltenga la fidelidá al son creáu por Dylan.
 
El cd va tar en breves nes tiendes, y representa  l'apertura d'un camín casi inóspitu pa la música fecha n'asturianu, pel que yá anduvieron xente como Los Berrones con aquella versión n'asturianu de "Bridge Over Troubled Water", de Simon And Garfunkel, que los de Tolivia  entitularon "Puente sobre agües braves".