"La UNESCO nun pue protexer si los propios gobiernos nun lo faen"

"La Tertulia Cultural El Garrapiellu, que los pasaos díes mandaba una delegación énte'l Comité Intergubernamental pa la Salvaguarda del Patrimoniu Cultural Inmaterial de la UNESCO aconceyáu en Sofía, valoraba esti xueves la so presencia nel foru internacional. Los dos representares de la Xunta Direutiva del Garrapiellu Ánxel Nava y Sixto Armán, asina como'l presidente de l'asociación, Tino Lozano, espusieron nel Atenéu Obreru de Xixón la necesidá de que los muérganos con competencies en materia llingüística faigan por ""protexer el patrimoniu cultural inmaterial"" porque ""la UNESCO nun lu pue protexer si los propios gobiernos nun lo faen"".

Asina lo espresaba Armán cuando falaba de la implicación de la UNESCO na salvaguarda del patrimoniu, tanto de calter material como inmaterial, y el fechu de que ""esista más comprensión sobre la llingua a nivel internacional que na propia Asturies"". Nesi sen valoráronse los contautos con responsables de Ministerios de Cultura, Universidaes, asina como colos propios representantes de la UNESCO, pa los que la llingua asturiana ""forma parte del Atlas de les Llingües en Peligru que l'organismu internacional cuenta espublizar esti añu"".

Ánxel Nava valoró asina mesmo la collaboración de l'Academia de la Llingua Asturiana nel asesoramientu de la documentación apurrida nel Comité, asina como'l sofitu económicu per parte de la Conceyalía de Cooperación, Cultura Tradicional y Llingua Asturiana del Ayuntamientu de Xixón.

Pela so parte, y poniendo-y el puntu a la rueda prensa'l Presidente de la Tertulia Cultural El Garrapiellu, Tino Lozano, sorrayó l'enfotu de l'asociación que representa por ""siguir col llabor entamáu"" y acabar cola ""falta de rigor y sensibilidá"" que dende'l so puntu de vista s'espresa dende Asturies cuando ""nun hai futuru ensin cultura""."