El Farho Xixón Baloncestu perdió'l partíu y el lideratu escontra'l Tarragona

"El Farho Xixón Baloncestu perdió escontra'l Tarragona pol resultáu de 72 a 74 ycon ello'l lideratu de la lliga LEB Plata, nun partíu que se decidió na prórroga que tuvo que xugase tres finar los cuarenta minutos reglamentaos con empate a 68. El conxuntu xixonés llegó a tener ventayes d'hasta nueve puntos, asina entamó'l últimu cuartu con un favoratible 55 a 46, pero nesi caberu periodu un entamu penosu de los locales fizo que los tarraconeneses ficieran un parcial de 0 a 8 y se metieran nel partíu, que dende esi momentu foi mui igualáu y que se decidió nos últimos segundos de la prórroga.

L'alcuentru foi malu y los dos equipos tuvieron mui mal nel ataque, asina nos tiros de trés los xixoneses metieron 3 de 18 intentos -un 17%- y los catalanes 5 de 27 -un 19%-. El lider la categoría ye agora l'Illescas y segundu l'Axarquía, que tán empataos a dieciséis victories colos asturianos pero tienen meyor ""basket average"". Na próxima xornada los xixoneses visiten al Santa Pola que ye penúltimu. El partíu entamó con 0 a 4 pal Tarragona, los xixoneses empataron y punxéronse delantre, anque Floyd entá punxo un 6 a 8, los catalanes nun diben volver a tar delantre nel marcador hasta los dos últimos minutos del tiempu regular. Los locales garraron el mandu del partíu y llegaron a tener siete puntos de ventaya, 15 a 8 y 17 a 10, pero ehí apaeció Barceló, xugador que diba ser perimportante pal Tarragona a lo llargo l'alcuentru, qu'averó al so equipu a un puntu, 18 a 17, con cinco puntos siguíos, anque Rubén Suárez dexó la ventaya en trés puntos, 20 a 17. Nel segundu cuartu los locales siempres tuvieron delantre nel marcador, anque Bravo empatara a 20 al so entamu. Un parcial de 9 a 0 punxo'l resultáu nun 29 a 20, que se repitió col 31 a 22. Dende ehí la ventaya foi amenorgándose y llegó a ser trés puntos, 32 a 29, pero Matt Kiefer con cuatro puntos siguíos punxo'l 36 a 29 y dos tiros llibres encestaos por Barceló dexó el lletrónicu al descansu nun 36 a 31. L'entamu del tercer cuartu foi igualáu y el Tarragona llegó a ponese a un puntu, 40 a 39, pero los asturianos volvieron a poner la separtación en seis puntos, 46 a 40.

La ventaya yera d'ente dos y cuatro puntos y la entrada nel campu de David Jandl fizo ameyorar a los xixoneses, que llograron un parcial de 7 a 0 y poner el resultáu a lo cabero'l periodu nun 55 a 46, que paecía frayar l'alcuentru pa los asturianos. L'últimu cuartu emprimó con un 0 a 8 pa los catalanes y un marcador de 55 a 54, ehí igualóse l'alcuentru y el Tarragona empató a 59 puntos, volvieron a empatar a 61 y 63 y ponese delantre con un 63 a 65, a dos minutos pa finar. Faltando cincuenta y cuatro segundos el resultáu yera d'empate a 65, Chus Pineda adelantó a los locales y Williams namás que metió un tiru llibre d'una personal, el marcador yera 67 a 66 a quince segundos. Los tarraconenses ficieron trés personales siguíes, pues entá nun taben nel bonus de les cinco personales, y Rubén Suárez namás que metió un tiru llibre, dempués Barceló metió dos tiros llibres d'una personal de Adrián García y hebo que xugar la prórroga.

Nel tiempu amestáu hebo munches perdes de balón y fallos y entróse nos últimos cincuenta y cuatro segundos colos catalanes cuatro puntos penriba, 70 a 74. Jandl metió los tiros llibre d'una personal y na siguente xugada los xixoneses recuperaron el balón pero Sony Vázquez falló'l triple. Nel alcuentru los asturianos nun pudieron cuntar con Peter Rajniak, que tuvo que ser operá'l vienres pela nueche d'apendicitis, y Brandon Wolfram xugó poco más d'once minutos. Pela so parte los catalanes presentáronse en Xixón con nueve xugadores de campu.

Ficha técnica: Farho Xixón Baloncestu: Rubén Suárez (6), Sony Vázquez (4), Adrián García (16), Chus Pineda (10) y Matt Kiefer (19).Tamién xugaron: José María Balmón (5), David Jandl (6), Logi Gunnarsson, Brandon Wolfram (6), Adrián Villadangos y David Piña.
Tarragona 2016: Enrique Garrido (7), Carles Bravo (14), Ramón Espuña (7) y Kerry Blackshear (8). Tamién xugaron: Gonzalo Sánchez (3), Ferrán Torres (2), Paul Williams (5), Jonathan Barceló (20) y John Floyd (8).

Árbitrios: Juan Pedro Morales y Javier Jérez. Nel Farho xixón Baloncestu foi elimináu por cinco faltes personales Rubén Suárez (minutu 44),nel Tarragona nun hebo xugadores eliminaos. Partíu de la ventésima primera xornada de la Lliga Adecco LEB Oro, xugáu nel Palacio de los Deportes de La Guía. Parciales per cuartos: 20-17, 16-14, 19-15, 13-22 y 4-6 (prórroga)."