L'ADBA ganó a un rival directu pa metese na fase pol ascensu

"L'ADBA algamó un trunfu perimportante sobre l'Ensino, ún de los sos rivales pa metese na fase clasificación, pol resultáu de 81 a 56. Amás con esti resultáu tamién ganen el ""basket average"", pues nel alcuentru la primera vuelta les gallegues ganaron por siete puntos, 75 a 68. Dempués d'aplazase'l partíu de la selmana pasada escontra'l Bembibre, por mor del gripe que azotara al equipu avilesín, había preocupación pola entidá del rival, pero l'equipu asturianu fizo un gran alcuentru y pasó penriba del equipu gallegu, sofitándose nel gran trabayu defesivu desendolcáu poles avilesines.

La superioridá local manifestóse yá bien ceo y asina mediáu'l primer cuartu yá s'alcontraben con una ventaya de diez puntos, 14 a 4 y al final del periodu yera de once, 26 a 15. Nel segundu cuartu les gallegues averáronse nel marcador y tuvieron a cinco punots, 30 a 25, anque un parcial asturianu de diez a cero llevó'l marcador a un 40 a 25, resultáu col que se llegó al descansu. Nel tercer cuartu l'equipu local fizo rotar a les sos xugadores y Jerica Watson mandaba baxo los tableros, llegándose al final del periodu con un 57 a 39. Nel últimu cuartu la ventaya local siguió enanchándose y llegó a ser de ventisiete puntos, anque al final foi de venticinco. Gran partíu de Jerica Watson que metió 22 puntos, garró 21 rebotes, dio 6 asistencies y tuvo una valoración de 48 puntos.

Ficha técnica:

ADBA: Verónia Alonso (7), Orinta Kavaliauskaite (7), Paula Ballvé (2), Zora Skrabalova (11) y Jerica Watson (22): Tamién xugaron: Esther Mesa, Carla González (1), Iratxe Cabrera, Jana Stantienova (12), Anna Boleda (11) y DeboraAbreu (8).
Durán Maquinaria Ensino: Regina Gómez (18), Aiste Slenyte (2), Gilmara Justino (13), Itziar Germán (16) y Mariana Couto (6). Tamién xugaron: Uxía Fernández, Almudena Puente (1) Y Sabela Uriz.
Árbitrios: Jesús Martínez Prada y Esteban Pombo. Nengún de los dos equipos tuvo xugadores elimanaes por cinco faltes personales. Partíu de la décimo octava xornada de la Lliga Femenina 2 Grupu A xugáu nel Complejo Deportivo Avilés. Parciales per cuartos: 26-15, 14-12, 17-12 y 24-17."