Zapatero asegura en Xixón que lluchará pola "igualdá y escontra la inxusticia"

"El Presidente del Gobiernu y candidatu del Partíu Socialista, José Luis Rodríguez Zapatero, participó esti miércoles nun mitin del PSOE nel polideportivu de la Guía, en Xixón, al que s'averaron 8.000 persones, según la organización, que recibieron al candidatu ente glayíos de ""presidente, presidente"".

Enantes de que falara Zapatero, intervinieron l'alcaldesa de Xixón, Paz Fernández Felgueroso; el presidente'l Principáu, Vicente Álvarez Areces; el secretariu de los socialistes asturianos, Javier Fernández y el cabeza de llista por Asturies, Álvaro Cuesta.

Zapatero entamó a falar asegurando que de la que llegaba a la Guía foi saludáu por un mozu de les Fuerces Armaes que-y dio les gracies porque ""gracies al PSOE pudi tornar d'Irak"". D'esta miente sorrayó que ""hai motivos pa creer nos que cumplen, nos que faen honor a la palabra y siempre dicen lo que piensen, como fizo'l PSOE nestos cuatro años"". Nesti sen insistió en que demientres que seya presidente nengún soldáu español va dir a una invasión militar""

José Luis Rodríguez Zapatero indicó que mañana entama la campaña y aseguró qu'él ""yá ta preparáu y en tensión, anque eso nun-y preste a Rajoy"". ""La sangre de les mios venes va en defensa de la igualdá, escontra la inxusticia, parando a los poderosos y denunciando la mentira, a la fin faciendo qu'esti país camine en progresu, llibertá ya igualdá""."