Versionando'l "Gaudeamus Igitur"

"La Universidá d'Uviéu acaba editar un CD, ""Gaudeamus 10"", compuestu por diez versiones del tema orixinal ""Gaudeamus Igitur"", l'himnu de les más de les universidaes europees. Nesti discu tán presentes dende versiones de folk, hasta pop, rock o música electrónica.

La esbilla de músicos que participen nel discu son: Dark la eMe, Nacho Vegas & Xel Pereda, Muni & Paco Loco, Koniec, Manta Ray, Toli Morilla, Jorge Explosion, Xuacu Amieva, Ramón Prada y el Coru Universitariu d'Uviéu.

Na presentación del trabayu Juan Vázquez, rector de la Universidá d'Uviéu, mostróse mui contentu pol trabayu y dixo que'l proyeutu ye mui orixinal y la obra ""moderna, viva y moza"". Nesti sen, comentó que la bayura de versiones y estilos aporten-y un puntu de vista nuevu al himnu orixinal. Amás dixo que la escoyeta de los diez temes nun foi al debalu, sinón a qu'esi númberu, nel ambiente universitariu, ye l'equivalente a la ""matrícula d'honor""."