Moratinos diz que nun pue comparase'l casu de Kosovo col de Cataluña o'l País Vascu

"El ministru d'Asuntos Esteriores, Miguel Ángel Moratinos, tornó a dicir qu'España nun va reconocer la independencia de Kosovo porque incumple la llegalidá internacional y provocó la ""división"" del Conseyu de Seguridá de Naciones Xuníes y de la Unión Europea. Nesti sen, Moratinos comparó la dixebra de la provincia serbia de mayoría albanesa cola guerra d'Irak. ""El Gobiernu español nun va reconocer l'actu unillateral proclamáu pola asamblea kosovar y nun lo va reconocer porque camentamos que nun respeta la llegalidá internacional"", dixo Moratinos a la entrada del conseyu de ministros d'Asuntos Esteriores de la XE, aconceyaos el llunes.

""El Gobiernu español siempre defendió'l respetu a la llegalidá internacional: defendiólu cuando decidió retirar les sos tropes d'Irak y defiéndelu agora cuando se trata de la dixebra del Estáu"", sorrayó. Dende'l so puntu de vista, la independencia de Kosovo namás será llegal si fuera'l resultáu d'un ""alcuerdu de les partes"" o si hubiera una resolución del Conseyu de Seguridá de la ONU.

España asítiase asina otra vuelta del llau de los países menos favoratibles a la reconocencia de Kosovo, xunto con Chipre, Grecia, Eslovaquia y Rumanía. Pela contra, el restu de grandes países de la UE - Alemania, Gran Bretaña, Francia ya Italia - amuésense favoratibles a reconocer la independencia Kosovar.

El ministru d'Asuntos Esteriores repitió amás que nun hai nengún paralelismu ente la independencia de Kosovo y la situación nel País Vascu y Cataluña. ""Nun se pue comparar la situación constitucional política y xurídica española colo que pasa nos Balcanes. A nós preocúpamos en xeneral la llegalidá internacional y la estabilidá na rexón"", dixo."