"Camín de Cantares" sigue marcando "records" d'audiencia

"El programa n'asturianu de la TPA 'Camín de cantares' marcó un récord d'audiencia'l pasáu sábadu ente les 12.55 y les 13.29 hores.

L'espaciu, presentáu por Xosé Ambás y protagonizáu nesta edición por Adolfina y Piro, del valle de Somiedu, tuvo una audiencia media de 28.000 espectadores, con un 30,2% de share, siendo la TPA cabezalera nesti horariu, asitiándose como la televisión más vista, per delantre de les cadenes nacionales y locales.

El programa, que yá va pela segunda temporada, fai un trabayu de recoyida de la tradición oral asturiana al traviés de los sos cantares y la so lliteratura oral, un trabayu qu'espeya nes voces de los sos protagonistes. Al final de cada capítulu'l grupu ""Tuenda"" del que forma parte'l propiu Xosé Ambás, fai una interpretación musical de dalgún de los temes que se recueyen durante'l capítulu.

""Camín de Cantares"", producíu por Publicaciones Ámbitu, ye ún de los pocos programes de la televisión pública qu'usen la llingua asturiana como llingua vehicular, desarrollando asina un llabor de normalización llingüística nún de los medios que más sonadía tien pa los sos falantes."