Faustino Zapico diz qu'UNIDÁ quier facer una política "dende Asturies y p'Asturies"

"Na primer Convención electoral de la Coalición formada por Izquierda Asturiana, Andecha Nacionaliega y Asturianistes, UNIDÁ desarrolló los puntos sobre los que s'asienta'l so programa ""asturianu, verde y d'izquierdes"", nuna Convención na que participaron dellos representantes de les diferentes estayes del partíu, asina como organizaciones, sindicatos y coleutivos sociales invitaos.

El númberu dos de la formación al Congresu, Faustino Zapico, sorrayó la intención de la coalición de facer una política ""dende Asturies y p'Asturies"", postura qu'enfrentó a la del restu de partíos de calter nacional.

No que cinca a la postura asturianista del partíu sorrayóse la intención de dir ""más allá de la oficialidá"", cola ""indispensable reconocencia xurídica"", pero amás potenciando l'asturianu fuera del ámbitu d'Asturies y faciendo de la llingua un instrumentu de cultura. D'otra miente, la formación salió en defensa del patrimoniu asturianu, nel so aspeutu cultural pero tamién natural, en clara referencia a la situación de los texos asturianos. No que cinca a lo cultural, y pasando al programa de vivienda de la formación, defendióse la creación d'un ""catálogu de patrimoniu rural"" pa sofitar les construcciones sostenibles cola arquitectura tradicional y el mediu natural. Al empar, y no que cinca al mediu urbanu, sorrayóse la necesidá de baxar el preciu la vivienda ""dende iniciatives polítiques"". Esi tipu d'iniciatives polítiques espeyaron nos plantegamientos económicos, sofitaos sobre l'exe de la ""xestión de los recursos propios"" y les ""polítiques sostenibles"" a nivel social y natural.

Ente les llinies propies del partíu asitiáronse tamién los plantegamientos n'estayes relatives a muyer, ecoloxía o educación, poniéndo'l puntu a la convención coles intervenciones de los cabeza de llista al Congresu y el Senáu, Lali García ya Inaciu Llope, respeutivamente."