L'ADBA ganó al Alcobendas y entra en plaza de fase d'ascensu

"L'ADBA ganó al Alcobendas por 87 a 60 y con ello vuelve a metese ente los cuatro primeros clasificaos, que tienen drechu a xugar la fase d'ascensu. L'Alcobendas, que ta na parte baxa la clasificación, venía de ganar al lider -el Pío XII de Santiago de Compostela- na xornada pasada, y asina les avilesines nun se confiaron y salieron mui metíes nel partíu dende'l so entamu y ficieron un gran primer cuartu, algamando una ventaya másima nel periodu de doce puntos, 23 a 11. Nun s'entregó l'Alcobendas y nel segundu cuartu llegó a empatar el partíu a 27, pero les avilesines garraron otra vegada'l mandu'l partíu y volvieron a tener doce puntos de ventaya, 43 a 31, anque al descansu'l resultáu yera de 46 a 37. Nel tercer cuartu les asturianes caltuvieron la ventaya y les madrileñes, anque nun se deben, nun se podíen averar nel marcador. Nel últimu cuartu foi cuando l'Alcobendas fundió, pues nel so entamu Anna Boleda colos sos triples frayaba a les madrileñes.

Les xugadores más destacaes de l'ADBA foron Jerica Watson (21 puntos, 9 rebotes, 4 asitencies, punxo 4 tapones, ficiéron-y 10 faltes personales y tuvo la meyor valoración del alcuentru con 39 puntos) y Anna Boleda (22 puntos, 2 rebotes y 5 asistencies). Nes madrileñes la más destacada foi Susana Senra (25 puntos, 7 rebotes, 1 asistencia y ficiéron-y 6 faltes personales).

Ficha técnica:

ADBA: Verónica Alonso (3), Anna Boleda (22), Paula Ballvé (8), Jerica Watson (21) y Zora Skrabalova (14). Tamién xugaron: Esther Mesa, Carla González (7), Iratxe Cabrera (2), Jana Stantienova (8) y Debora Abreu(2).

Isolux-Corsan Alcobendas: Ana Aritzmendi, Sara Castrillo (8), Kirenia Cabrera (5), Susana Senra (25) ya Iris Samaniego (13). Tamién xugaron: Tania Franco, Patricia Alonso (6), María Blanco, Mónica Garrido (3) y Genoveva Tapia.

Árbitrios: Fermín González y David Insa. Nengún de los dos equipos tuvo xugadores eliminaes por cinco faltes personales. Partíu de la decimosesta xornada de la Lliga Femenina 2 Grupu A xugáu nel Complejo Deportivo Avilés. Parciales per cuartos: 25-15, 21-22, 18-15 y 23-8."