El Farho Xixón Baloncestu sofrió pa ganar al Palencia que-y dio muncha guerra

"El Farho Xixón Baloncestu sofrió pa ganar al Palencia nun partíu mui igualáu y que se decidió del llau xixonés nos dos últimos minutos, siendo'l resultáu final de 86 a 77. La sosprendente derrota del Illescas na so casa col Santa Pola, ún de los colistes de la clasificación, dexa a los asturianos lideres de la clasificación, empataos a victories colos castellanomanchegos y el Vic.

Otra vegada l'equipu xixonés volvió a xugar un mal partíu y namás cuando les coses se punxeron mal, col Palencia ganando d'ocho puntos nel tercer cuartu, foi cuando apaecieron la calidá y la capacidá de reacción d'esti equipu. Hasta entós el Palencia plantegó-yos muncho problemes y tuvo nun tris de facese col alcuentru. Hai que tener en cuenta que nesti partíu y en dellos anteriores el Farho Xixón vien teniendo munches baxes y torgues por mancadures, asina Brandon Wolfram nun xugó nin un segundu y sigue colos sos problemes nuna rodiella, y amás esta selmana cortóse a Sergio Alonso, que de seguío fichó plo Palencia y estrenóse con ellos nel partíu d'ayeri. Asina les coses Logi Gunnarsson tuvo que xugar de base, hasta que llegue l'austriacu David Jandl, recien ficháu y que va incorporase esti llunes. L'aspeutu negativu del alcuentru púnxolu Edward Santana que foi espulsáu del alcuentru polos árbitrios dempués de cuspir a ún d'ellos nel últimu minutu, yá enántes-y pitaran una técnica pola so actitú y amás el so comportamientu foi mui antideportivu a lo llargo tol partíu.

Los dos primeros cuartos foron mui igualaos y les ventayes d'un y otru equipu yeren curties, asina los locales nel primer cuartu llegaron a tar seis puntos delantre, 18 a 12, pero nun yeren a marchase. Nel segundu cuartu les coses taben igual y la másima ventaya local foi de cinco puntos en delles ocasiones, pero'l Palencia nun se descolgaba y nos últimos segundos púnxose delantre nel marcador y llegóse al descasu con un 40 a 41. Nel tercer cuartu les coses siguíen igualaes hasta que, a falta de dos minutos pa finar el periodu, un parcial de cero a ocho distanció a los palentinos, 50 a 58, ehí pudo frayase l'alcuentru pero ehí apaeció la calidá de los xugadores locales y otru parcial de ocho a ún dexó'l marcador nun 58 a 59. Salió mui fuerte l'equipu xixonés nel últimu cuartu y metió-yos un parcial de trece a cero, 71 a 59, ello obligó a pidir tiempu muertu a Natxo Lezcano, entrenador palentinu, pues diben cuasi cinco minutos y entá nun metieran un puntu, y dió-y resultúa pues el so equipu centróse y algamó otru parcial de dos a trece y punxéronse a un puntu, 73 a 72, faltando poco más de dos minutos pa finar.

El partíu taba abiertu, pero los asturianos nun se precipitaron y xugaron meyor esos minutos finales con un José María Balmón que tuvo perbien, pues fizo seis puntos y ficiéron-y dos faltes personales, amás nos palentinos a Santana ensin xacíu pitáben-y dos personales -una d'elles técnica- y la espulsión. Los xugadores locales más destacaos foron Matt Kiefer (17 puntos, 8 rebotes y ficiéron-y 11 faltes personales), José María Balmón (18 puntos y 9 rebotes) y Adrián García (9 puntos, 8 rebotes y 3asistencies). Nel Palencia'l más destacáu foi Avi Forcada (14 puntos, 3 rebotes y 4 asistencies).

Ficha técnica:

Farho Xixón Baloncestu: Rubén Suárez (4), Sony Vázquez (7), Adrián García (9), Chus Pineda (19) y Matt Kiefer (17). Tamién xugaron: Peter Rajniak (12), José María Balmón (18) y Logi Gunnarsson.

Alimentos de Palencia: Ted Berry (11), Xavi Forcada (14), Jorge Coelho (6), Sotiris Manolopoulos (13) y Edwars Santana (11). Tamién xugaron: Javi Pérez (9), Juanpe García (9) y Sergio Alonso (4). Árbitrios: Roberto Alonso y Francisco de Asís Marín.

Nel Farho Xixón Baloncestu foi elimináu por cinco faltes personales Chus Pineda (minutu 37) y nel Palencia Edward Santana (minutu 39). Partíu de la decimonovena xornada de la Lliga Adecco LEB Plata xugáu nel Palacio de Deportes de La Guía cola asistencia d'unes mil persones. Parciales per cuartos: 21-17, 19-24, 18-18 y 28-18."