El Sporting dexa la plaza d'ascensu

El Sporting de Xixón cayó de los puestos de descensu dempués de 19 xornaes cola so derrota n'Elche, un campu tradicionalmente gafu pal equipu asturianu, que pasa per una crisis grave de xuegu y de resultaos. Un penalti al poco d'entamar comet´ñiu sobre Noel Williams, referencia n'ataque del Elche, punxo la cosa mui empruna pal Sporting, pero'l conxuntu de Preciado retrucó con un bon xuegu, rápidu y precisu, que llevó al empate, obra de David Barral, que sigue mostrándose como'l delanteru más efectivu de la plantiya. Llamentablemente, cuando más taba apertando'l Sporting, un error defensivu dexaba al Elche otra vez con ventaya gracies a Raul Martín. L'equipu asturianu esfarrapló dafechu anque yera'l minutu 24 y tiró'l restu del partíu, volviendo al pase llargu y la falta d'idees, llegando al final yá ensin fuelgu dempués d'un gran desgaste que nun tuvo más premiu qu'un balón a la madera de Mate Bilic a pase de Matabuena, el meyor sportinguista del alcuentru y que se fartucó a recuperar balones. Con too y con ello, l'empate entovía paecía posible pa un Sporting que xugaba con 4 delanteros con más nerviu qu'orden, pero nel últimu minutu, un penalti innecesariu tresformáu por Vega punxo'l marcador final a favor d'un Elche con menos calidá pero que foi más equipu, tuvo más aguante, y supo esperar a que'l Sporting cometiera errores y cansara de llevar el pesu del partíu.