La Xunta acusa a FSA y PP de "usar l'asturianu como arma d'enfrentamientu políticu"

"La Xunta Pola Defensa de la Llingua Asturiana acusó esti xueves al PSOE y PP de ""usar l'asturianu como arma d'enfrentamientu políticu, dalgo que nun fai nada pol clima de consensu que tien que dase na cuestión de los drechos llingüísticos d'Asturies"". La organización fizo alcordanza de los cruces d'acusaciones ente dambos partíos a partir de les declaraciones n'amestáu de Gabino de Lorenzo, y en favor d'una mayor proteición de la llingua dende'l Principáu.

La Xunta recordó que ""l'usu del asturianu pol candidatu 'popular' Gabino de Lorenzo provocó unes declaraciones llamentables del secretariu d'organización de la FSA, Jesús Gutiérrez, retándolu a dicir si taba a favor de la oficialidá"". ""Ye tanta la perceguera que-y tien al asturianu fuera del ámbitu de la casa y del chigre que, cuando ve que s'usa pa falar de política, Gutiérrez ponse nerviosu"", sorraya'l comunicáu. ""Pela so parte, Gabino de Lorenzo, sigue cola so táctica de facer cantos d'amor al asturianu, pero ensin demostralo más allá d'esi tipu de retayos"", añadió.

Según La Xunta, a la FSA présta-y ""usar la oficialidá del asturianu como si fuera un cocu p'asustar a los neños, y nesa dinámica tamién acabó cayendo'l diputáu popular Joaquín Aréstegui, con unes declaraciones obre oficialidá na llinia del 'quiero y nun pueo', volviendo a alitar la pantasma de la obligatoriedá"". ""¿Va atrevese Aréstegui a falar d'obligatoriedá a los sos compañeros de Galicia y Valencia, comunidaes con abondos años de Gobiernu popular y onde les sos llingües son oficiales?"".

Pa la Xunta, la oficialidá ""nun pue ser un arma pa tirase a la cabeza unos a otros, sinón que ye un asuntu de drechos ciudadanos, un tema ensin resolver dende hai 30 años que sigue ehí""."