El PP de Xixón sal en defensa del asturianu

"El Partíu Popular de Xixón denunció esti xueves de manera pública, pente medies d'un comunicáu escritu dafechamente n'asturianu, el ""bloquéu del ayuntamientu a la promoción de la llingua"" sorrayando la ""paralización"" de la presentación d'una ordenanza municipal sobre l'usu del asturianu, amás de la ""precariedá"" del funcionamientu de la Oficina Municipal de la Llingua.

Dende'l puntu de vista de los populares ""dende l'añu 2004 ta paralizada la presentación d'una ordenanza municipal"" al tiempu que recordaron ""la dimisión del Conseyu Asesor de la Oficina Municipal de la Llingua pol continuu refugue a la normalización llingüística amosáu polos responsables del PSOE ya IX"". Amás denuncien la probe aplicación de la toponimia oficial del conceyu, tanto nel usu alministrativu como la rotulación.

El pallabres del grupu popular ""l'equipu de gobiernu, col asturianu, vende fumu y nun fai nada"". Polo que proponen una riestra de midíes ""empobinaes a una verdadera promoción de la llingua de nueso"", ente les que rescamplen ""l'aprobación d'unes ordenances municipales pal usu del asturianu, la potenciación de la Oficina Municipal de la Llingua y la creación d'un nuevu Conseyu Asesor"". Al empar sorrayaron la so intención de crear un ""Plan Municipal de Política Llingüística"", garantizando asina ""l'usu del asturianu na publicidá institucional del conceyu, l'usu de los topónimos oficiales nos cartelos, mapes y documentos, o l'accesu de la ciudadanía a productos y servicios n'asturianu de toa mena""."