Valledor acusa al Principáu de “desterrar” l’asturianu de l’Alministración

"El diputáu d'Izquierda Xunida na Xunta Xeneral del Principáu, Javier García Valledor, pidió-y al PP ""fechos práuticos qu'amuesen la so posición al rodiu la llingua"". No que cinca a les caberes declaraciones del voceru popular, Gabino de Lorenzo. Valledor valoró positivamente ""la posición del Partíu Popular y del so voceru sobre l'asuntu l'asturianu"", pero sorrayó que ""nun va más allá de los pronunciamientos"". Del alcalde d'Uviéu dixo amás que'l so ayuntamientu ""aconceyó una vegada cola Xunta Asesora de Toponimia, y nunca nun volvieron a falar"".

Asina, desixó-yos a los populares que ""amuesen fechos práuticos na so posición"". Per otru llau, el diputáu d'IX acusó al Gobiernu asturianu d'incumplir mandáu del parlamentu relativu a la presentación d'una evaluación del Plan de Normalización Llingüística porque ""amosaría la parada del mesmu y la vuelta atrás na política llingüística"". Según el parlamentariu ""tán desandándose tolos pasos de la llexislatura anterior"", faciendo referencia sobre manera al currículum d'Infantil, les campañes de comunicación billingüe o la presencia l'asturianu na TPA. Sorrayando amás ""l'empeñu del Gobiernu asturianu d'incumplir la Llei de d'Usu""

No que cinca a la polémica d'estos díes al rodiu de los Servicios de Normalización, Valledor dixo que ""estos servicios diben a ampliase y potenciase, y a la fin tán funcionando con torgues y en dellos casos, como los de Samartín del Rei Aurelio o Mieres, dexando de funcionar"".

Pa finar García Valledor declaró que la intención del Principáu ye ""desterrar la llingua de l'Alministración"", y anque valoró positivamente iniciatives como la de la presencia del asturianu na Expolangues de París, manifestó que les más de les actuaciones ""entren dientro d'esa proteición del asturianu como un elementu d'esposición nos museos y non como una llingua viva que tien de tener unos drechos básicos nuna sociedá democrática""."