Unidá quier ufiertar una voz “ asturiana, verde y d’izquierdes”

"Los representantes d'UNIDÁ, coalición qu'axunta a Izquierda Asturiana (IAS), Andecha Nacionaliega y a Asturianistes (partíu formáu por grupos asturianistes locales ente los que rescampla Asturianistes por Nava), presentaron los candidatos al Congresu y el Senáu y les principales llinies del programa de la coalición que constitúi la única alternativa d'ámbitu estrictamente asturianu que se presenta a les elecciones del 9 de marzu axuntando a la izquierda nacionalista y verde y al asturianismu políticu.

Lali García, cabeza de llista al Congresu sorrayó'l ""valor del alcuerdu ente distintes fuercies polítiques p'algamar una UNIDÁ que se demanda históricamente nel nacionalismu asturianu y l'asturianismu"", amás amestó que ""la candidatura incorpora a persones venceyaes al ecoloxismu, a la cultura asturiana y a la izquierda social, colo que damos calce a la visión de l'Asturies real que nun comulga col discursu arecista -y el del so satélite IX- y énte'l que l'alternativa reaccionaria del PP nun supón nenguna meyora"".

Ignaciu Llope, cabeza de llista al Senáu, concretó les llinies básiques del programa de la coalición que consisten na ""defensa d'un nuevu modelu de desarrollu sostenible pal país, frente al modelu actual que fai d'Asturies el basureru enerxéticu d'Europa; la demanda d'un nuevu marcu políticu que reconoza'l calter nacional d'Asturies y la oficialidá de la llingua asturiana; un sistema de financiación qu'asegure la viabilidá económica de los nuesos sectores productivos y el bienestar social; y un apueste decidíu, énte les tentaciones represives que tamos viviendo n'Asturies, polos derechos civiles y la igualdá de xéneru"".

Faustino Zapico, númberu 2 al Congresu de los diputaos y coportavoz de la coalición, afitó que ""UNIDÁ ye la única candidatura que namás se debe a los intereses del pueblu asturianu y que nun ta prindada n'últimu términu poles decisiones que se tomen en Madrid por fuercies que se deben a dinámiques ayenes a Asturies"". Tanto Patricia Teja (conceyala d'Asturianistes por Nava y númberu 4 de la llista al Congresu) como'l conceyal d'UNIDÁ-Andecha por Carreño, Santi Artime (númberu 3 de la lista al Congresu) manifestaron la importancia de que l'asturianismu y el nacionalismu de calter local tenga un referente fuerte d'ámbitu asturianu, que sía a oponer un modelu distintu al actual discursu dominante.

Pa finar, Germán Abad, coportavoz de la coalición, anunció que'l próximu 9 de febreru UNIDÁ va celebrar nel Auditoriu Príncipe Felipe una Convención Electoral na que se van presentar el programa electoral completu y les llinies de la campaña y que va cuntar cola presencia de tolos candidatos."