Otra derrota más en casa pal Sporting

"El Sporting de Xixón amestó otra derrota más en casa nun partíu que supunxo la estrena d'Hidalgo, el fichaxe colombianu. El fechu de que'l rival, Las Palmas, llegare con cuatro baxes de los sos teóricos titulares, nun supunxo ventaya nenguna pal Xixón, que tuvo enfrente siempre un equipu mui seriu. El Sporting salió con fuerza y Mate Bilic tuvo delles ocasiones que nun llegó a convertir, llegando la polémica con un gol anuláu al croata por un orsai que les cámares demostraron que nun fuera. Sicasí, Las Palmas tamién pudo llegar al descansu con ventaya gracies a l'asturianu Adrián, el meyor del so equipu ayeri. Roberto atayó los sos tiros con bones intervenciones, y el Sporting dexó una impresión de conxuntu probetaya, rifando muncho'l balón y ensin más recursu d'ataque que'l pase en llargo. Na segunda parte, el Sporting intentó dar una imaxen un poco meyor y apertó con más gana sobre la potería canaria, pero tuvo siempre faltu de velocidá y de resolución nos últimos metros. La reacción duró poco. Adrián armó una contra na que Roberto midió mal y salió fuera del área pa cortar l'avance del xugador, que marcó a puerta vacia. El Molinón calló tres del fallu del equipu y el Sporting yá nun llevantó más cabeza nin colos cambeos, qu'intentaron dar más velocidá al conxuntu ensin llogralo. Nin Hidalgo, nin Omar nin Jorge Pina foron a enderechar un partíu más pa la decepción en casa."