L'ADBA ganó n'Ourense y caltiénse nos puestos altos la clasificación

"L'ADBA algamó un trunfu perimportante pa mantenese na parte alta de la clasificación -son quintes empataes a victories col Canoe, que son cuartes- nel campu del Pabellón Ourense pol resultáu de 51 a 70. El partíu yera perimportante pa les locales, pues tán nos puestos caberos de la clasificación y asina la primera parte foi igualada y al descansu'l resultáu yera de 35 a 38. Nel tercer cuartu les avilesines frayaron l'alcuentru sofitándose nuna perbona defensa y nel so contraataque y el resultáu déxalo bien claro, 4 a 14. Nel últimu cuartu nun hebo sospreses y la ventaya clatúvose nel marcador y el trunfu vieno p'Avilés.

Hai de destacar el bon partíu de Jerica Watson (15 puntos y 8 rebotes), d'Anna Boleda (16 puntos, 1rebotes y 5 asistencies) y de Zora Skrabalova (10 puntos y 5 rebotes). Na prósima xornada visita Avilés l'Alcobendas que tamién ta nos puestos baxos la clasificación.

Ficha técnica:
Pabellón Ourense: Raquel Asensio (17), Verónica Blanco (9), Cristina Odriozola (2), Mar Ahijado (5) y Soraya Barca (10). Tamién xugaron: Bárbara Lamelo (2), Andrea Carrera (4) y Pamela Moral (2).

ADBA: Verónica Alonso (2), Anna Boleda (16), Paula Ballvé (5), Jerica Watson (17) y Zora Skrabalova (10). Tamién xugaron: Orinta Kavaliauskaite (5), Esther Mesa, Carla González (5), Iratxe Cabrera (2), Jana Stantienova (6) y Debora Abreu (2).
Árbitrios: Jacobo Rial y Pablo Manuel Sanjurjo. Na ADBA nun hebo xugadores eliminaes por cinco faltes personales, nel Pabellón Ourense foron eliminaes Cristina Odriozola y Mar Ahijado. Partíu de la decimoquinta xornada de la Lliga Femenina 2 Grupu A, xugáu nel Pabellón Municipal de los REmedios. Parciales per cuartos: 18-17, 17-21, 4-14 y 12-19."