Abiertu'l plazu pa votar los meyores trabayos musicales del 2007

"Yá ta abiertu'l plazu pa votar los meyores trabayos musicales del 2007. Pa ello nun hai más qu'entrar na páxina web de los Premio AMAS y dexar el votu. Ente les venti categoríes alcuéntrase la de grupu revelación, meyor cantante o meyor videuclip. Los nominaos a toes elles foron esbillaos pola propia redaición del Anuariu de la Música d'Asturies y les suxerencies que foron recibiendo d'aficionaos particulares.
L'añu pasáu llevaron premiu grupos como Tejedor, Dixebra, Alto Volto o La Bandina pol so videuclip ""La Caleya"". Pa saber los d'esti añu vamos tener qu'esperar hasta'l 28 de febreru a partir de les nueve la nueche, día nel que l'Asociación Cultural Canal Asturias, organizadora del actu, descubrirá los nomes nel Teatru Filarmónica d'Uviéu."