L'Academia de la llingua asoleya un estudiu sociollingüísticu de Lleón

"L'Academia de la llingua Asturiana presenta estos díes la edición del Estudiu Sociollingüísticu de Lleón, obra ellaborada polos profesores universitarios Xosé Antón González Riaño y Xosé Lluis García Arias, que yá nel añu 2006 presentaren un estudiu sociolóxicu que precedió al qu'agora s'asoleya y que tuvo centráu nos 17 conceyos de Lleón que llenden directamente con Asturies.

Ente les conclusiones más importantes que puen entesacase del estudiu ta'l datu de que los lleoneses aprecien la so fala tradicional, qu'además caltién un porcentaxe, anque pequeñu, de falantes. Na parte de les actitúes, l'estudiu rescampla como la mayoría de los lleoneses piden dalgún tipu de reconocimientu llegal de la so fala tradicional y como los más d'ellos tan a favor d'una collaboración con Asturies nesi sentíu. Según l'estudiu, una décima parte de los encuestaos reconocen qu'empleguen la llingua tradicional nel ámbitu familiar, anque a la hora d'identificar qué ye lo que se fala, nun hai una idea clara, y asina la mayoría de los lleoneses, con reconocer que tienen una fala tradicional, nun son a determinar si esta ye diferente del castellanu."