Rodríguez Zapatero niega que'l castellán tea "prohibíu" o les llingües minoritaries "marxinaes"

Zapatero aseguró nel Senáu que la "realidá" llingüística española ye un "puntu d'equilibriu, un puntu intermediu" ente los que piensen que'l castellán "ta prohibíu nuna parte del territoriu nacional" y los que ven "marxinaes" les llingües cooficiales, y añadió qu'esi términu mediu ye'l que persigue l'Executivu: "defensa de les llingües cooficiales, pero tamién lóxicamente defensa, apoyu y proteición del castellán".

   Asina, respondió Zapatero al voceru del PNV nel Senáu, Joseba Zubia, que-y entrugó pol apoyu del Gobiernu a les llingües minoritaries demientres la sesión de control na Cámara. Zubia acusó al presidente de nun cumplir coles sos intenciones de primeros de mandatu ne 2004, y de demostrar que'l so dicursu daquella "taba vacíu de conteníu". La situación pal gallegu, l'euskera o'l catalán, sentenció Zubia, nun meyoró.

   El voceru del PNV repasó una vez más l'informe del comité d'Espertos del Conseyu d'Europa que repasa la situación d'estes llingües nel Estáu y lu emplegó pa pidir meyores n'educación, nos medios de comunicación públicos, na Xusticia o na Alministración Xeneral del Estáu, incluyíes les Delegaciones del Gobiernu, y apuntó nesti sen que sólo'l 16 por cientu de los funcionarios estatales del País Vascu fala euskera.

   Joseba Zubia reclamó a Rodríguez Zapatero que tome midíes pa cumplir "los sos compromisos" y que "faiga pedagoxía a favor del plurillingüismu real", y pa esplicar que l'apoyu a les llingües cooficiales nun supón marxinar el castellán, acabó.

   Rodríguez Zapatero, qu'aseguró comprender les crítiques del PNV, defendió'l trabayu del Gobiernu no que-y correspuende y repasó les distintes midíes llexislatives y d'otru tipu tomaes, que promueven l'usu d'estes llingües nel accesu electrónicu de los ciudadnaos a l'alminsitración estatal, na educación, o nel Rexistru Civil, nel permisu de cirulación, nes campañes institucionales, o en determinaos ámbitos de la Unión Europea. Pa él, l'informe del Comité d'Espertos citáu por Zubia reconoz sin embargu que'l modelu español ye un "exemplu de bones práutiques".

   "Ye un modelu apropiáu", dixo'l presidente. "Tamos nuna vía razonable pa cumplir col mandatu constitucional", acabó Rodríguez Zapatero. El xefe del Executivu recordó a lo último que'l Conseyu de les Llingües Cooficiales va realizar un informe sobre la situación d'estos idiomes na Alministración del Estáu que va ser base pa "midíes complementaries".