Convocáu'l XXX Premiu d'Investigación "Juan Uría Ríu"

La Conseyería de Cultura convocó la XXX edición del premiu del Premiu "Juan Uría Ríu" pa trabayos d'investigación de carácter históricu, etnográficu, filolóxicu, musical, etc. sobre cultura asturiana. Los trabayos pueden tar escritos n'asturianu o en castellanu y pueden entregase hasta'l próximu 30 de xunu. El premiu ta dotáu con seis mil euros.

Pueden optar a esti premiu cualesquier persona, ensin distinción de nacionalidá, grupu o equipu d'investigación que nun fuere premiáu n'ediciones anteriores. Los trabayos tarán escritos en castellanu o asturianu, serán inéditos y tendrán una estensión mínima de 200 fueyes mecanografiaes a doble espaciu per una sola cara. Asimesmo los trabayos nun tarán firmaos nin presentarán nota o inscripción que pueda contribuir a identificar el nome del autor. Han entregase nel Rexistru de la Conseyería de  Cultura y Turismu, asitiáu na cai Eduardo Herrera "Herrerita", s/n d'Uviéu. Cada obra presentaráse en dos sobres zarraos onde escribiráse "PREMIO JUAN URÍA 2009", conseñando'l títulu de la obra y l'alcuñu del autor. Nel sobre "A" dirán: datos del autor/a (dirección, teléfonu y un breve currículum); y  nel Sobre "B" los trabayos, que presentaránse en papel por cuadruplicáu y nun CD col testu en formatu PDF.

El premiu ye de 6.000 €, pudiendo xebrase en dos partes iguales o bien declarase ermu a xuiciu del Xuráu.