Riopedre xustifica la baxada de profesoráu pola perda d'alumnos

"La mengua de 125 places de profesor orgánicu n'Edución Primaria y Secundaria, anunciada pol gobiernu del Principáu, débese principalmente a la reducción del númberu d'alumnos nos últimos cuatro años, qu'en secundaria foi de 2.808. El conseyeru d'Educación, José Luis Iglesias Riopedre, ofreció ayeri esta esplicación, y negó tamién que los profesores en cuestión vayan perder el so emplegu.

Matizó que van destinase a llabores funcionales, tales como coordinación de nueves tecnoloxíes, orientación, atención a los inmigrantes y estayes billingües. En rueda de prensa, acompañáu de los directores xenerales de Planificación de Centros, María Jesús Otero, y de Recursos Humanos, Arturo Verano, Riopedre salía asina al pasu de les últimes crítiques recibíes, tanto dende'l sector sindical de la enseñanza, como del Partíu Popular y del so diputáu na Xunta Xeneral, Emilio Rodríguez. Dende dambes partes acusóse al Gobiernu d'un recorte de plantiya. Según el parlamentariu popular, l'oxetivu de la mengua diba ser ""facer caxa"" col oxetu de compensar los aumentos de costes del nuevu Hospital Central y de la Universidá Llaboral.

El conseyeru negó que se vayan suprimir puestos de trabayu, y insistió en que se trata d'una redistribución de profesores pa ""reforzar programes que tienen de siguir creciendo, como los departamentos d'orientación en Primaria, les estayes billingües, los coordinadores de nueves tecnoloxíes y l'atención a los inmigrantes"". Asina, reiteró que los 125 profesores (14 de Primaria y 111 de Secundaria) ""nun pierden la so plaza, sinón que lo peor que-yos pue pasar ye que queden nel centru realizando otres funciones o colen pa otru"".

El conseyeru xustificó esta midida recordando que nos últimos cuatro años, n'educación secundaria, el númberu d'alumnos baxó en 2.808, lo que va conllevar el zarru d'unidaes, y los profesores de les memes van tener que ""orientase a trabayar n'otros programes"". Riopedre matizó que cuando se fala de reducción de plantiya refierse a plantiya orgánica, la cual ""defínese en función de les unidaes"". Añadió nesti sen que nun centru suel haber un 80% de plantiya orgánica y un 20% de plantiya funcional, compuesta polos profesores dedicaos a programes como los anteriormente mencionaos.

El conseyeru aprovechó pa defender la so xestión, señalando que nos últimos ocho años ""perdiéronse 26.331 alumnos y ganáronse un total de 726 profesores"", ""lo cual quier dicir que'l saldu ye positivu"". Añadió que, dende'l cursu 1999-2000, primero dempués de la llegada al Gobiernu del Principáu de los socialistes, hasta l'actual, se pasó d'una tasa de 10,86 estudiantes por cada docentes a los 7,7. Señaló tamién l'aumentu del gastu por alumnu, que según los sos datos, foi de 3.568 euros nel añu 2000 a 6.606 nel exerciciu actual. En contraposición, refirióse a la etapa na que'l Partíu Popular gobernó n'Asturies (1995-1999), na que ""zarraron 508 unidaes de la enseñanza pública, un fechu ensin precedentes nel panorama educativu autonómicu""."