L’equipu de fútbol de L’Entregu recibió’l premiu “Andrés Solar” de la Xunta Pola Defensa de la Llingua

"La Xunta Pola Defensa de la Llingua celebró esti sábadu 19 la ceremonia d'entrega de los XXIII Premios Andrés Solar, que se fexo en Salón d'Actos del Antiguu Institutu Xovellanos de Xixón énte numberosu públicu. El Pegollu 2007, premiu que econoz el meyor llabor a favor del asturianu, foi pal equipu de fútbol de L'Entregu, que compite na categoría de rexonal preferente y que lleva'l so nome col topónimu tradicional del llugar, dalgo que pa la organización supón ""una gran aportación a la visualización y normalización de la llingua asturiana nel ámbitu del deporte"".

Los directivos del equipu entreguín recibieron y agradecieron el premiu, cosa que nun fexo l'agraciáu cola Madreña Purpurina, premiu a la persona o institución cola actitú más dañible pa col asturianu y que foi nesta edición pal secretariu xeneral de la FSA . Ello ye que como suel pasar, el premiáu negativu nun acudió a la ceremonia, lo que nun quitó pa que recibiere los calificativos más duros por parte de la organización. La Xunta recordó la ""trayectoria d'ataques y esibiciones de prexuicios contra la llingua asturiana y contra los derechos llingüísticos de los asturianos y asturianes"" de Javier Fernández. La Xunta, nel discursu institucional qu'acompaña a la entrega de premios, recordó les sos últimes declaraciones a la prensa nes qu'oponía'l valor de la llingua asturiana a los valores del ciudadanu cosmopolita, dalgo que la organización calificó de ""discursu caducu y retrógadu que nun correspuende a un cosmopolita, sinon más bien a un cosmopaletu"". La Xunta llevó a tola clase política asturiana'l xuiciu negativu a Fernández, asegurando que ""viendo'l cargu qu'ocupa nel partíu que gobierna Asturies, da una imaxe orientativa del escasu altor de mires de los nuesos dirixentes"".

Cola mirada puesta nel procesu de reforma del estatutu, la Xunta fexo nel so discursu un llamáu a los partíos mayoritarios n'Asturies ""pa que fagan un exerciciu de responsabilidá y abandonen el discursu de la confrontación y el mieu, que dean un pasu más y s'atrevan a reconocer dafechu los derechos llingüísticos de los asturianos y asturianes"" un llabor pa la que la Xunta alvirtió que va ""siguir na protesta, pero tamién na propuesta sobre la base del consensu más ampliu"". El cantautor Toli Morilla echó'l pieslle musical al actu."