L'ADBA perdió en casa y baxa al sétimu puestu

"L'ADBA perdió col Arxil n'Avilés pol resultáu de 69 a 74 y baxa al sétimu puestu la clasificación, a cuatro victories del primeru -el Pío XII- y a dos de los puestos que dan drechu a xugar la fase d'ascensu. Nes asturianes estrenábase la xugadora checa Zora Skrabalova, que va ocupar el puestu de la letona Dace Cinite, que torna a xugar a un equipu del so país.

Anque'l partíu emprimó con 0 a 6 pa les gallegues, les locales nun se dieron, con un gran trabayu de Jerica Watson, y a lo cabero'l periodu'l resultáu yera d'empate a venti. Nel segundu cuartu les asturianes llegaron a tener una ventaya d' ocho puntos, 37 a 29, y al descansu yera de cinco, 41 a 36. Nel tercer cuartu foi cuando les avilesines fundieron, negaes nel aru contrariu, y un parcial de 10 a 21, punxo a lo cabero'l periodu un resultáu de 51 a 57. Nel últimu cuartu, nel so entamu, les pontevedreses tuvieron doce puntos de ventaya, 53 a 65 y 55 a 67, anque les locales llegaron a ponese a cuatro puntos, 66 a 70, dempués d'un parcial de 11 a 3. Nel últimu minutu les asturianes llegaron a tar a un puntu, 69 a 70, pero la remontada total nun foi posible y el resultáu final foi de 69 a 74. Gran partíu de Jerica Watson (con dobles figures -22 puntos y 14 rebotes- y 34 puntos de valoración la meyor del alcuentru), tamién fizo doble figures Dace Cinite (19 puntos y 10 rebotes). L'equipu avilesín foi mui superior nel rebote -sobre too nel ofensivu- garrando 47 por 24 de les gallegues, anque tuvo mui mal nel tiru de trés con 3 aciertos de 25 intentos -un 12%-.

Ficha técnica:

ADBA: Anna Boleda (5), Orinta Kavaliauskaite (14), Verónica Alonso, Jerica Watson (22) y Dace Cinite (19). Tamién xugaron: Esther Mesa, Paula Ballvé, Iratxe Cabrera, Zora Skrabalova (9), Jana Stantienova, y Teresa Riera.

C. B. Arxil Comervía: Marta Cobián (11), Verónica Sánchez (9), Natalia Soage (21), Tatiana Gómez (11) y Sandra Entenza (8), Tamién xugaron: Sara Krasinirova, Marina Janeiro, Rumayna Nikolovska (12) y Tamara Milovac (2).

Árbitrios: Jesús Martínez Prada y Julio César Alonso. Na ADBA nun hebo eliminaes por faltes personales y nel Arxil foi eliminada Tatiana Gómez. Partíu de la decimotercera xornada de la Lliga Femenina 2 Grupu A, xugáu nel Complejo Deportivo Avilés con un cientu espectadores. Parciales per cuartos: 20-20, 21-16, 10-21 y 18-17."