L'ALLA denuncia la discriminación del asturianu nel curriculum

"L’Academia de la Llingua Asturiana emitió ayeri un comunicáu de prensa en que denunció la propuesta de Curriculum d’Educación Infantil ellaborada por educación. Según l'ALLA, la propuesta incumple gravemente la llegalidá "" sorrayando la entidá como'l testu ""falta dafechu al espíritu y la lletra de la Llei d’Usu del Asturianu, darréu que l’artículu 10.1 de la mesma garantiza la enseñanza de la llingua asturiana en tolos niveles y graos educativos"". L'ALLA denuncia que ""Les referencies, escases y descontestualizaes, que’l testu curricular fai del asturianu constitúin un recursu de maquillax qu’en nengún casu dexa la posibilidá d’enseñar y dignificar la nuesa llingua nesta estaya educativa"" y conclúi que, arriendes d’ello ""amuesa una gran debilidá didáutico-pedagóxica al nun tener en cuenta que l’asturianu ye la llingua familiar de munchos escolinos d’Asturies colo qu’ello implica de desventaya pal deprendizax de la llingua castellana y/o estranxera"".

L’Academia de la Llingua Asturiana recuerda que ""en contautos calteníos col Conseyeru d’Educación, féxo-y ver estes circunstancies asina como la grave responsabilidá de la Conseyería nel casu de caltenese l’actual estáu de redaición del documentu curricular"". La institución, en tou casu, alvierte que ""fairá llegar a los responsables educativos del Principáu les enmiendes afayadices pa que la presencia de la Llingua Asturiana s’axuste a les llendes xurídiques calteníes na Llei d’Usu del Asturianu y anima a la comunidá educativa asturiana, dende padres y madres d’escolinos, sindicatos d’enseñanza y profesoráu a facer lo propio""."