La sidra 'brut' del Grupu Trabanco viende tol xéneru n'España y los Estaos Uníos

"La sidra 'brut' del Grupu Trabanco, denominada ""Poma Áurea"", acabó nel 2007 el so primer unvíu n'España y Estaos Uníos, según informaron fontes de la empresa al traviés d'una nota de prensa. El pasáu mes d'abril el llagar de Llavandera (Xixón) presentaba en sociedá les primeres 11.000 botelles de Poma Áurea, sidra ellaborada siguiendo'l métodu 'brut nature' y certificada como Sidra d'Asturies Denominación d'Orixen Protexida (DOP).

Nel mes d''avientu, acabóse esta primer remesa -comercializada en toa España y n'Estaos Uníos, principalmente- y salío a la venta una producción de 11.000 botelles más. Más d'un 30% d'esti primer unvíu destinóse a la campaña de Navidá y comercializóse al traviés de regalu d'empresa y n'establecimientos d'alimentación. En cuantes a zones xeográfiques, destacó la distribución n'Asturies, Madrid y La Rioja. ""La campaña de Navidá foi mui positiva porque mos permitió ampliar el volume pontencial de consumidores, ya que la distribución al traviés de regalu d'empresa fizo que muncha más xente probara esta sidra y qu'hasta mos llegaren felicitaciones pola calidá del productu"", aseguró Samuel Menéndez Trabanco, xerente de Grupu Trabanco.

Según acabe esta segunda producción, Grupu Trabanco prevé llanzar remeses nueves, hasta algamar una producción de 30.000 botelles nel añu 2008 (aparte de les 22.000 que ya se punxeron a la venta). Poma Áurea, certificada pol Conseyu Regulador, comercialízase al traviés de dos canales principalmente, l'alta restauración y les tiendes de productos 'delicatessen'."