El Farho Xixón Baloncestu perdió'l primer partíu nel so campu y el lideratu

"El Farho Xixón Baloncestu perdió la imbatibilidá en casa col Axarquía malagueñu, filial del Unicaja Málaga, y tamién con ello' lideratu de la Lliga LEB Plata dempués de que l'Illescas ganare por un puntu al Palencia. El resultáu final foi de 68 a 78 pero los xixoneses fundieron yá nel minutu ventiséis del partíu cuando ganaben de seis puntos, 55 a 49. L'alcuentru entamó col equipu andaluz yá mui metíu nél, defendiendo con muncha intensidá y en tol campu -anque nun marchaben nel marcador-, que los asturianos nun yeren a frayar, y asina tardaron cuasi trés minutos en meter el primer puntu. Dempués un parcial de 10 a 0 de los locales permitió-yos garrar una ventaya d'ocho puntos, 18 a 10 -la mayor que tuvieron los xixoneses en tol partíu-. Al emprimar el segundu cuartu la ventaya caltúvose y Elorduy fizo delles rotaciones, Sergio Alonso entró por Rubén Suárez y Lucian Kieser por Matt Kiefer, pero nun dieron resultáu, asina Alonso perdió varios balones siguíos y nun yera a parar a Adrián Fuentes, pela so parte Kieser fizo trés personales en cuatro minutos. Los andaluces llegaron a empatar a 29 y ponese delantre con ventayes d'ún y dos puntos, 33 a 34 y 35 a 37, pero que volviera Matt Kiefer al campu valió pa que se llegara al descansu con una ventaya de trés puntos, 42 a 39. Tres el descansu les coses taben igualaes y los asturianos taben delantre con ventayes d'ente ún y cuatro puntos hasta llegar a un 55-49 que foi la última ventaya local. Un tiempu muertu del entrenador visitante Paco Aurioles, llevó a un parcial de 0 a 15 con dos xugadores que tomaron les riendes del alcuentru, el brasileñu Prestes y el polacu Chylinsky, el primeru machancando baxo tableru y sacando personales a los pivotes asturianos y el segundu con dos triples siguíos que-yos valieron pa garrar una ventaya de nueve puntos, al entamu del últimu cuartu, que los locales yá nun foron a llevantar.

Quedaben munchos minutos, pero la intensidá y el bon xuegu de los malacitanos -el meyor equipu que pasó esta temporada per La Guía- xunto a delles decisiones de los árbitrios, que foron mui protestaes pol públicu, acabaron colos asturianos, que dieron una mala imaxe. Nel Farho Xixón Baloncestu faltó Brandon Wolfram, pola so mancadura na rodiella, y Sony Vázquez, con rotura frebes, pero ello nun val de xustificación, pues nos andaluces tamién-yos faltaba'l so americanu Williams. Esti yera'l primeru d'una riestra partíos perimportante que tien de xugar el Farho Xixón, pues na prósima xornada va a Plasencia y dempués xuega col Almería -tamién fuera-, que ta cuartu a una victoria y lleva ocho partíos siguíos ganaos.

Nos asturianos gran partíu de Matt Kiefer (21 puntos, 13 rebotes, ficiéron-y 6 faltes personales y tuvo la meyor valoración con 31 puntos), y tamién hai que destacar a Chus Pineda (14 puntos y 7 rebotes) y Peter Rajniak (11 puntos 1 rebote). Nos andaluces los más destacaos foron Paolo Prestes (20 puntos, 12 rebotes y ficiéron-y 6 faltes personales), Adrián Fuentes (15 puntos y 1 rebotes) y Micha Chylinsky (16 puntos y 4 rebotes).

Ficha técnica:
Farho Xixón Baloncestu: Rubén Suárez (11), Peter Rajniak (11), Adrián García (4), Chus Pineda (14) y Matt Kiefer (21). Tamién xugaron: Logi Gunnarsson (7), Sergio Alonso y Lucian Kieser.

Clínicas Rincón Axarquía: Adrián Fuentes (15), Jon Kortaberria (3), Alejandro Navajas (9), Pablo Movilla (4) y Paulo Prestes (20). Tamién xugaron: Rai López (7), Michal Chylinsky (16), Pablo Almazán (4) y Marcos Ejido.

Árbitrios:Miguel Ángel Garmendia y José María Valle. Nel Farho Xixón Baloncestu foi elimináu por cinco faltes personales Matt Kiefer (minutu 37), nel Axarquía nun hebo xugadores eliminaos. Partíude la decimosesta xornada de la Lliga Addeco LEB Plata, xugáu nel Palacio de los Deportes de la Guía con unos mil espectadores. Parciales per cuartos: 24-20, 18-19, 13-19 y 13-20."